ಬೆಂಗಳೂರಿನ ಜನನಿಬಿಡ ಅಥವಾ ನಗರದ ಹೃದಯ ಭಾಗವೆನಿಸಿಕೊಂಡಿರುವ ಗಾಂಧಿ ಬಜಾರಿನ ತುಂಬಾ ಬರಿಯ ಜನರೇ ಜನರು. ಆದರೆ ಇವೆಲ್ಲದರ ನಡುವೆ ಅಪರೂಪವೆನಿಸುವಂತೆ ಬಹಳ ದೊಡ್ಡ ಪುರಾತನ ಮನೆಯೊಂದು ನೋಡಲು ನಿಮಗೆ ಸಿಗುತ್ತದೆ. ಗೇಟಿನ ಹೊರ ಭಾಗದಿಂದ ಏನೂ ಗೊತ್ತಾಗುವುದಿಲ್ಲ. ಒಳ ಹೊಕ್ಕೊಡನೆಯೇ ಸಸ್ಯಕಾಶಿಗೇ ಹೋದಂತೆ ಭಾಸವಾಗುತ್ತದೆ.
ಮನೆಯ ಮುಂದೆ ಬೆಳ್ಳನೆಯ ಪುಟ್ಟ ಪುಟ್ಟ ಹೂಗಳು. ಬಿಳುಪನ್ನು ಹೆಚ್ಚಿಸುವ ಎನ್ನುವ ಕಡುಗೆಂಪಿನ ಎಲೆಗಳನ್ನು ಮೈದುಂಬಿಸಿಕೊಂಡ ಸಸ್ಯಗಳು. ಅದರ ಹಿಂಭಾಗಕ್ಕೆ ಗುಲಾಬಿ ಬಣ್ಣದ ಎಲೆಗಳು. ಪಕ್ಕದಲ್ಲಿ ಅವೆಲ್ಲಕ್ಕೂ ತಂಪನ್ನು ಸೂಸುವ ಸ್ವಲ್ಪ ಎತ್ತರದ ಹಸಿರು ಗಿಡಗಳು, ಹಳೆಯ ಕಾಲದ ಅರಮನೆಗಳ ಕಿಟಕಿಗಳನ್ನು ನೆನಪಿಸುವ ಎತ್ತರದ ನಡು ಗೋಡೆ, ಅದರ ಕೆಳ ಭಾಗದಲ್ಲಿ ಸಾಲಾಗಿ ಕಡುಗೆಂಪು ಮತ್ತು ಹಸಿರು ಮಿಶ್ರಿತ ಎಲೆಗಳ ಕುಂಡಗಳು, ಸಮಸ್ತ್ರವನ್ನು ಧರಿಸಿವೆಯೇನೋ ಎಂದು ಭಾಸವಾಗುವಂತೆ ಈ ಕುಂಡಗಳ ಪಕ್ಕಕ್ಕೆ ನಿಂತ ಹಸಿರು ಬಣ್ಣದ ಕ್ಯಾಕ್ಟಸ್‌ನ್ನು ಹೊತ್ತಿರುವ ಸಾಲು ಕುಂಡಗಳು, ಕಾಂಪೌಂಡಿನ ಮೇಲ್ಭಾಗಕ್ಕೆ ಪುಟ್ಟ ಹಸಿರು ಬಾಳೆಯ ಗೊನೆಗಳಂತೆ ತೊನೆದಾಡುವ ಕ್ಯಾಕ್ಟಸ್‌ಗಳು. ಅದರ ಮುಂದಿನ ಕಾಲು ದಾರಿಯ ಪಕ್ಕಕ್ಕೆ ನೆಟ್ಟಗೆ ನಿಂತ ಮರ, ಅದರ ಸುತ್ತಲೂ ಜೋಡಿಸಿಟ್ಟ ಹೂವಿನ ಕುಂಡಗಳು, ತೋಟದ ಬಹು ಭಾಗವನ್ನು ಆಕ್ರಮಿಸಿರುವ ಹಸಿರು ನೆಲ ಹಾಸು, ಅದರ ಉದ್ದಕ್ಕೂ ಕೆಂಪಗೆ ಹೊಳೆಯುತ್ತಾ ನಿಂತ ಗಿಡಗಳು, ಮನೆಯ ಮುಂದೆ ಚಾಮರದಂತಹ ಗಿಡಗಳು, ಮನೆಯೊಡತಿಗೆ ಗಾಳಿಯನ್ನು ಬೀಸುತ್ತಿದೆಯೇನೋ ಎನ್ನುವಂತೆ ಅತ್ತ ಬಾಗಿದೆ. ಸ್ವಲ್ಪ ಮುಂದೆ ಬಂದರೆ ದಟ್ಟ ಹಸಿರು, ಕಡುಗೆಂಪು, ತಿಳಿ ಹಸಿರು ಗಿಡಗಳಿಂದ ಕಂಗೊಳಿಸುವ ಸಸ್ಯಕಾಶಿ.
ಮನೆಯತ್ತ ಸಾಗುವ ಹಾದಿಯಲ್ಲಿ ಯಾವುದೊ ಉದ್ಯಾನವನದಲ್ಲಿ ಸಾಗುತ್ತಿರುವೆವೆಂಬ ಭಾವವನ್ನು ನೀಡುವ ಅಕ್ಕಪಕ್ಕಗಳನ್ನು ತುಂಬಿಕೊಂಡಿರುವ ಬಣ್ಣ ಬಣ್ಣದ ವರ್ಣಿಸಲಸದಳವಾದ ಗಿಡಗಳು ಯಾರೋ ನುರಿತ ಕಲಾವಿದ ಬಣ್ಣಗಳ ಜೊತೆ ಆಟವಾಡುತ್ತಾ ಎಲ್ಲವೂ ಕಣ್ತುಂಬಿಸುವಂತೆ ಮೂಡಿಸಿರುವ ಸಸ್ಯ ಸಮೂಹ. ಆಗಮಿಸುವವರ ಹಾದಿಯಲ್ಲಿ ಅಕ್ಕಪಕ್ಕ ಸ್ವಾಗತ ಹಾಡುತ್ತಿವೆಯೇನೋ ಎನ್ನುವಂತಿರುವ ವರ್ಣರಂಜಿತ ತರುಲತೆಗಳು.
ಈ ಸುಂದರ ತೋಟದಲ್ಲಿ 400ಕ್ಕಿಂತಲೂ ಹೆಚ್ಚು ಸಸ್ಯಗಳಿವೆ. ಸಾಧಾರಣ ಗಿಡಗಳಿಂದ ಹಿಡಿದು ಅತಿ ಅಪರೂಪವೆನಿಸುವ ಗಿಡಗಳಿವೆ. ಉದಾಹರಣೆಗೆ ಆರ್ಕಿಡ್‌, ಟೆಲಾನ್ಸಿಯಾ ಅಥವಾ ಏರ್‌ಪ್ಲಾಂಟ್‌ ಎನ್ನುವ ಗಿಡಗಳು ಮತ್ತು ಬೀಜಗಳನ್ನು ಬೇರೆ ಬೇರೆ ದೇಶಗಳಿಂದ ತರಿಸಲಾಗಿದೆ. ಸೌತ್‌ ಈಸ್ಟ್ ಏಷ್ಯಾದಿಂದ ತರಿಸಿದ ಗಿಡಗಳು ಬಹಳ ಚೆನ್ನಾಗಿ ಬೆಳೆದಿವೆ. ಕೆಲವಂತೂ ಬಹಳ ಸಮೃದ್ಧಿಯಾಗಿ ಬೆಳೆದಿವೆ.
ಕೆಲವು ಸಸ್ಯಗಳು ಪರಿಸರದ ಗಾಳಿಯ ಗುಣಮಟ್ಟವನ್ನು ಉತ್ತಮಗೊಳಿಸುತ್ತವೆ. ಅಂತಹವುಗಳಲ್ಲಿ ಪೀಸ್‌ ಲಿಲಿ, ಸ್ಪಾಟಿಫಿಲಮ್, ಟೆಸ್ಟಸ್‌ ಫ್ಲೈ ಮುಂತಾದ ಗಿಡಗಳು ತೋಟದ ಎಲ್ಲ ಕಡೆಯಲ್ಲೂ ಪಸರಿಸಿವೆ. ಒಳಾಂಗಣದ ತೋಟದಲ್ಲಿ ಆರ್ಕಿಡ್ಸ್ ಮತ್ತು ಆಫ್ರಿಕನ್ ವಲ್ವೆಟ್ ಸಸ್ಯಗಳಿವೆ. ಆಫ್ರಿಕನ್ ವಲ್ವೆಟ್‌ನಿಂದ ಹೊರಸೂಸುವ ವೈಬ್ರೇಶನ್ಸ್ ನಿಂದ ಸುತ್ತಲಿನ ವಾತಾವರಣ ಶಾಂತವಾಗುತ್ತದೆ ಎಂದು ಕೆಲವು ಅಧ್ಯಯನಗಳು ತಿಳಿಸಿವೆ.
ಪ್ರತಿ ವರ್ಷ ಲಾಲ್‌ಬಾಗ್‌ ಪುಷ್ಪ ಪ್ರದರ್ಶನದಲ್ಲಿ ಇವರಿಗೆ ಯಾವಾಗಲೂ ಬಹುಮಾನ ಮೀಸಲು. ಕಳೆದ ಹದಿನೈದು ವರ್ಷಗಳಿಂದ ಹೋಮ್ ಗಾರ್ಡ್‌ನ ವಿಭಾಗದಲ್ಲಿ ಬಹುಮಾನ ಬಂದಿದೆ.
ವೀಳ್ಯದೆಲೆ, ಓಮ, ತುಳಸಿ, ಬೇಸಿಲ್‌, ಸ್ಟೀವಿಯ, ಅಮೃತಬಳ್ಳಿ, ನಾಗದಾಳೆ, ಪುದೀನಾ, ಕರಿಬೇವು ಎಲ್ಲವೂ ಇಲ್ಲಿ ಲಭ್ಯ. ಅನೇಕ ಔಷಧೀಯ ಸಸ್ಯಗಳಿವೆ.
ಒಂದು ಓಮ ಎಲೆ, ಒಂದು ತುಳಸಿ ಎಲೆ, ಒಂದು ಹರಳು ಉಪ್ಪು, ಒಂದು ಚಿಕ್ಕ ಸಾಂಬಾರ್‌ ಈರುಳ್ಳಿ ಈ ಮೂರನ್ನು ಒಂದು ವೀಳ್ಯದ ಎಲೆಯಲ್ಲಿ ಸುತ್ತಿ ಬಾಯಿಗೆ ಹಾಕಿಕೊಂಡು ಜಗಿದು ರಸವನ್ನು ಹೀರಿಕೊಳ್ಳುತ್ತಾ ಇದ್ದರೆ ಈ ಥಂಡಿ ಕಾಲದಲ್ಲಿ ಬರುವ ಕೆಮ್ಮು ಮಾಯವಾಗುತ್ತದೆ ಎನ್ನುತ್ತಾರೆ ಮನೆಯೊಡತಿ ಕಾಂತಿ. ಈ ಎಲ್ಲ ಅವರ ತೋಟದಲ್ಲೇ ಲಭ್ಯ ಎನ್ನುವುದು ಅವರ ಅಭಿಮಾನದ ಮಾತು.
ಕಾಂತಿ ಬಹುಮುಖ ಪ್ರತಿಭಾವಂತೆ. ಸೇವಾ ಮನೋಭಾವ ಹೊಂದಿದರು. ಆಶಾ ಸಂಸ್ಥೆಯಲ್ಲಿ ಬಡ ಮಕ್ಕಳಿಗೆ ಪಾಠ ಹೇಳುತ್ತಾರೆ. ಆ ಮಕ್ಕಳಿಗೆ ಹೇಳಿಕೊಡುವ ಪಾಠಗಳನ್ನು ರೂಪಿಸುವಲ್ಲಿ ಇವರ ಪಾತ್ರ ಹಿರಿದು. ಅಷ್ಟು ಭವ್ಯ ಮನೆಯ ಒಡತಿಯಾದರೂ ಸರಳ ಜೀವಿ. ಆ ಮಕ್ಕಳ ಜೊತೆ ನೆಲದ ಮೇಲೆಯೇ ಕುಳಿತು ಪಾಠ ಹೇಳಿಕೊಡುತ್ತಾರೆ. ಆಶಾ ಸಂಸ್ಥೆಯವರು ನಡೆಸುವ ಎಲ್ಲಾ ಚಟುವಟಿಕೆಗಳಲ್ಲೂ ಇವರ ಸೇವೆ ಅಪಾರ. ಪಾಠ ಹೇಳಿ ಕೊಡುದಿರಬಹುದು ಅಥವಾ ಪಾಠವನ್ನು ನಿರೂಪಿಸುದಿರಬಹುದು ಎಲ್ಲಕ್ಕೂ ಸೈ. ಇವರಿಗೆ ಎಲ್ಲವನ್ನು ಕಲಿಯುವುದರಲ್ಲಿಯೂ ಆಸಕ್ತಿ.
ತಮ್ಮ ಉದ್ಯಮದಲ್ಲೂ ತಮ್ಮನ್ನು ಪೂರ್ಣವಾಗಿ ತೊಡಗಿಸಿಕೊಂಡಿದ್ದಾರೆ. ಅವರ ಕಂಪನಿಗಳ ನಿರ್ದೇಶಕಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಬಿಡುವಿನ ವೇಳೆಯಲ್ಲಿ ಆ ಬಡ ಮಕ್ಕಳಿಗೆ ಇವರ ಸೇವೆ ಮೀಸಲು.
ಈ ಮನೆಯ ಸೌಂದರ್ಯಕ್ಕೆ ಮನೆಯೊಡತಿ ಕಾಂತಿ ಅವರ ಪತಿ ಅರವಿಂದ್‌ ಅವರೂ ಕಾರಣರು. ಇವರ ಹವ್ಯಾಸ ಕಲೆ, ಕರಕುಶಲ, ಪುಸ್ತಕಗಳು, ಪ್ರವಾಸದ ಜೊತೆಗೆ ತೋಟಗಾರಿಕೆಯೂ ಹೌದು. ಹೀಗಾಗಿ ಮನೆಯೊಳಗೆ ಅಪರೂಪದ ದೇಶ ವಿದೇಶದ ವಸ್ತುಗಳು, ತಂಜಾವೂರ್‌ ಪೇಂಟಿಂಗ್ಸ್, ವೃಂದಾವನದ ಸ್ಟೋನ್‌ ವರ್ಕ್‌ ಪೇಂಟಿಂಗ್ಸ್, ಗೋಡೆಯ ಮೇಲೆ 200 ವರ್ಷದ ಪುರಾತನ ನಕ್ಷೆಗಳು, ಯೂರೋಪಿನ ಶಿಲಾ ಮುದ್ರಣಗಳು.
ಜೊತೆಗೆ ಆಫ್ರಿಕಾ ಮತ್ತು ಮಾಲ್ಡೀವ್ ದೇಶದ ಬುಡಕಟ್ಟು ಜನಾಂಗದ ಮುಖವಾಡಗಳು, ಕಾಂಬೋಡಿಯಾ, ವಿಯೆಟ್ನಾಂ, ಬಾಲಿ ಮತ್ತು ಭಾರತ ದೇಶದ ಮರದ ಮುಖ ಕೆತ್ತನೆಗಳು, ಮಹಾರಾಷ್ಟ್ರದ ವಾರ್ಲಿ ಚೌಕಟ್ಟುಗಳು, ಜಲವರ್ಣದ ಪಿಂಗಾಣಿ ಚೌಕಟ್ಟುಗಳು, ಒಂದೇ ಎರಡೇ…. ಹೋದ ದೇಶಗಳಲ್ಲೆಲ್ಲಾ ಅಪರೂಪವೆನಿಸುವ, ಪ್ರಸಿದ್ಧವೆನಿಸುವ ಕಲಾ ರೂಪಗಳನ್ನು ತಂದು ಮನೆಯೊಳಗೆ ಅಲಂಕರಿಸುವುದು ಇವರಿಗೆ ಪ್ರೀತಿಯ ವಿಷಯ. ಇನ್ನು ಮನೆಯ ಮುಂದಿನ ತೋಟದ ವಿಷಯ ಹೇಳಬೇಕೆಂದರೆ ಮಕ್ಕಳಿಗಿಂತಲೂ ಅವರಿಗೆ ತೋಟದ ಬಗ್ಗೆ ಒಂದು ಕೈ ಪ್ರೀತಿ ಹೆಚ್ಚೇ!
ಇವರ ತಂದೆ 80ರ ಹರೆಯದ ಎಂ.ಕೆ. ರಾಮಚಂದ್ರ, 78 ವರ್ಷದ ತಾಯಿ ಸುಶೀಲಾ ತಮ್ಮ ಇಳಿ ವಯಸ್ಸಿನಲ್ಲೂ ಸದಾ ತಮ್ಮ ಕರ್ತವ್ಯದಲ್ಲಿ ನಿರತರು. ಖ್ಯಾತ ಉದ್ಯಮಿಯಾದರೂ ನಿರ್ಗರ್ವಿ ಮತ್ತು ಪರಿಸರ ಪ್ರೇಮಿ. ಒಟ್ಟಾರೆ ತುಂಬು ಕುಟುಂಬದ ಸಂಸಾರ ಮತ್ತು ಮನೆಯ ಸುತ್ತ ಆವರಿಸಿರುವ ಹಸಿರು ಸಸ್ಯಕಾಶಿಯಲ್ಲಿನ ಜೀವನ ಇವರದು.
– ಮಂಜುಳಾ ರಾಜ್‌
