ಕೆ.ಇ.ಬಿ. ಆಫೀಸ್‌ ಎದುರುಗಡೆ ನಮ್ಮ ಗುಂಡ ಬಾಳೆಹಣ್ಣು ಮಾರುತ್ತಾ ಕೂತಿದ್ದ. ಆಫೀಸಿನ ಮುಖ್ಯ ಎಂಜಿನೀಯರ್‌ ಬಂದು ಕೇಳಿದರು, ``ಬಾಳೆಹಣ್ಣಿನ ರೇಟ್‌ ಎಷ್ಟು?''
ಗುಂಡ : ಬಾಳೆಹಣ್ಣು ಯಾವುದಕ್ಕೆ ಸಾರ್‌....
ಎಂಜಿನಿಯರ್‌ : ಯಾಕೆ ಯಾವುದಕ್ಕೆ ಆದ್ರೂ ನಿನಗೇನು....?
ಗುಂಡ : ಯಾಕೆ ಅಂದ್ರೆ ದೇವಸ್ಥಾನಕ್ಕೆ ಡಜನ್‌ಗೆ 40 ರೂ., ವೃದ್ಧಾಶ್ರಮಕ್ಕೆ 45 ರೂ., ಮಕ್ಕಳಿಗಾದ್ರೆ 50 ರೂ., ಮನೆಗೆ 55 ರೂ., ಮತ್ತೆ ಪಿಕ್ನಿಕ್‌ಗೆ ಆದ್ರೆ 60 ರೂ. ಡಜನ್‌ಗೆ.
ಎಂಜಿನಿಯರ್‌ : ಅಲ್ಲ ಕಣಯ್ಯಾ.... ಬಾಳೆಹಣ್ಣು ಎಲ್ಲಾ ಒಂದೇ ಅಲ್ವಾ...? ಇದೇನು ಮಾರಾಯಾ ಬೇರೆ ಬೇರೆ ರೇಟು ಹೇಳ್ತೀ....?
ಗುಂಡ : ಸಾರ್‌ ಇದನ್ನು ನಾನು ನಿಮ್ಮ ಹತ್ರಾನೇ ಕಲಿತೆ ಹೇಗೆಂದರೆ....? 110 ಯೂನಿಟ್‌ಗೆ ಒಂದು ರೇಟ್‌, 100-200ಕ್ಕೆ ಒಂದು ರೇಟ್‌, 200-300ಗೆ ಒಂದು ರೇಟ್‌. ಕರೆಂಟ್‌ ಏನು ನಿಮ್ಮ ಅಪ್ಪಂದ ನೀವು ಕೂಡ ಒಂದೇ ಕಂಬದಿಂದ ತಾನೇ ಕೊಡೋದು, ಮತ್ತೆ ಮನೆಗೆ ಒಂದು ರೇಟ್‌, ಅಂಗಡಿಗೆ ಒಂದು ರೇಟ್‌, ಫ್ಯಾಕ್ಟರಿಗೆ ಒಂದು ರೇಟ್‌, ಅದರ ಮೇಲೆ ಟ್ಯಾಕ್ಸ್... ಹ್ಞಾಂ ಆಮೇಲೆ ಮೀಟರ್‌ ಬಾಡಿಗೆ ಮತ್ತೆ ವರ್ಷಕ್ಕೊಂದು ಸಲ ಎಕ್ಸ ಟ್ರಾ ಚಾರ್ಜ್‌ ಬೇರೆ.... ಒಂದು ಸಲ ಬಾಡಿಗೆ ಎಷ್ಟು ಅಂತ ಹೇಳಿ ಒಂದೇ ಸಲ ಪೂರ್ತಿ ಹಣ ಕೊಟ್ಟು ಸ್ವಂತಕ್ಕೆ ತೊಗೊಂಡು ಬಿಡ್ತೀವಿ. ಈಗ ಎಂಜಿನಿಯರ್‌ಗೆ ಮಂಗ ಆಗೋ ಸರದಿ!!
ಇದೀಗ ಬಂದ ಸುದ್ದಿ ......ನೆಲ ಒರೆಸುತ್ತಿದ್ದಾಗ ಅಡ್ಡಾಡಿದ ಗಂಡನನ್ನು ಗುಂಡಿಟ್ಟು ಕೊಂದ ಪತ್ನಿ.
ಪತ್ರಕರ್ತ : ಶೂಟ್‌ ಮಾಡಿದ 10 ನಿಮಿಷಕ್ಕೇ ನೀವು ಅಲ್ಲಿಗೆ ಹೋದ್ರಿ, ಆದರೂ ಅರೆಸ್ಟ್ ಮಾಡಲು 25 ನಿಮಿಷ ಯಾಕೆ ಲೇಟ್‌ ಮಾಡಿದ್ರಿ ಸಾರ್‌.....?
ಇನ್ಸ್ ಪೆಕ್ಟರ್‌ : ನೆಲ ಇನ್ನೂ ಆರಿರಲಿಲ್ಲ.....!!
ಅವರು ಹಿರಿಯ ವ್ಯಾಕರಣ ವಿದ್ವಾಂಸರು. ಅವರ ಆಯುಷ್ಯ ಮುಗಿಯಿತೆಂದು ಪ್ರಾಣ ಕೊಂಡೊಯ್ಯಲು ಸಾಕ್ಷಾತ್‌ ಯಮನೇ ಬಂದ.
ಯಮ : ನಿಮ್ಮ ಪ್ರಾಣ ಬೇಕು.
ವಿದ್ವಾಂಸರು : ಅಲ್ಪ ಪ್ರಾಣವೋ....? ಮಹಾ ಪ್ರಾಣವೋ....?
ಯಮ : ಅಯ್ಯೋ..... ಅದ್ಯಾವುದೂ ಅಲ್ಲ ನಿಮ್ಮ ಪಂಚಪ್ರಾಣ ಬೇಕು.
ವಿದ್ವಾಂಸರು : ಇಲ್ಲೇ ಪಕ್ಕದಲ್ಲೇ ಮಲಗಿದ್ದಾಳೆ ನೋಡು ತೆಗೆದುಕೊಂಡು ಹೋಗು.....
ಯಮ ಫುಲ್ ಶಾಕ್‌.....!!!!
ಗಂಡ : ಸುಮಾ..... ಸ್ವಲ್ಪ ಟವೆಲ್ ಕೊಡ್ತೀಯಾ ಮರೆತು ಸ್ನಾನಕ್ಕೆ ಹಾಗೆ ಬಂದುಬಿಟ್ಟಿದ್ದೆ.... ಕರೆಂಟ್‌ ಹೋಗಿ ಗೀಸರ್‌ ಬಿಸಿ ನೀರು ಕೊಡದೆ ತಣ್ಣೀರಲ್ಲೇ ಸ್ನಾನ ಮುಗಿಸಿ ನಡುಗುತ್ತಿದ್ದೀನಿ.... ಬೇಗ ಟವೆಲ್....
ಹೆಂಡತಿ : ಆಹಾ..... ಏನು ಬಡ್ಕೋಬೇಕೋ ನಿಮ್ಮ ಜಾಣತನಕ್ಕೆ? ಅಲ್ರೀ..... ಟವೆಲ್ ಇಲ್ಲದೆ ನೀವು ಸ್ನಾನಕ್ಕೆ ಹೋಗಿದ್ದಾದರೂ ಯಾಕೆ ಅಂತ? ನನಗಿಲ್ಲಿ ಮೈ ಪರಚಿಕೊಳ್ಳಲಿಕ್ಕೂ ಪುರಸತ್ತಿಲ್ಲ ಅಂದ್ರೆ ನಿಮಗೆ ಈ ಸೇವೆ ಬೇರೆ ಬೇಕೋ? ನಿಮಗಂತೂ ಏನೂ ಗೊತ್ತಾಗೋಲ್ಲ.... ಸ್ನಾನ ಆದ ತಕ್ಷಣ ಕಾಲು ಒರೆಸಿಕೊಳ್ಳದೆ ಹಾಗೆ ಬಂದುಬಿಡ್ತೀರಿ, ಬಾತ್‌ರೂಂ ಗ್ಲಾಸ್‌ನ ವೈಪರ್‌ ಕೂಡ ಬಳಸಲ್ಲ! ಹೋಗಲಿ ಅಂದ್ರೆ ಬಾತ್‌ರೂಮಿನಿಂದ ಬರುವಾಗ ಅಲ್ಲಿನ ಲೈಟ್‌ ಕೂಡ ಆಫ್‌ ಮಾಡಲ್ಲ.... ಏನು ಕರ್ಮ ಅಂತೀನಿ! ನಿಮ್ಮಿಂದಾಗಿ ಇಡೀ ಬಾತ್‌ರೂಂ ಗಬ್ಬೆದ್ದು ಹೋಗಿದೆ. ಮೊನ್ನೆ ನೋಡಿದರೆ ಆ ಕೆಲಸದ ನಿಂಗಿ ಅಲ್ಲಿ ಜಾರಿ ಬಿದ್ದು ಸೊಂಟ ಮುರಿದುಕೊಂಡು 3 ದಿನ ಕೆಲಸಕ್ಕೆ ಚಕ್ಕರ್‌ ಹಾಕಿದ್ದಾಳೆ.... ನಾನೇ ಎಲ್ಲಾ ಮಾಡಿ ಸಾಯಬೇಕು, ಯಾರಿದ್ದಾರೆ ನನಗೆ ಸಹಾಯ ಮಾಡಕ್ಕೆ? ನೀನು ಬದುಕಿದ್ದೀಯಾ ಅಂತ ಕೇಳೋರೂ ಯಾರೂ ಇಲ್ಲ.... ಇದ್ರಲ್ಲಿ ಟವೆಲ್ ಅಂತೆ ಟವೆಲ್!
