ಮನೆಯವರ ಒತ್ತಾಯಕ್ಕೆ ಮಣಿದು ಮಂಜುಳಾ ಮದುವೆ ಮಾಡಿಕೊಂಡು ಅತ್ತೆ ಮನೆಗೇನೋ ಸೇರಿದಳು, ಆದರೆ ಅಲ್ಲಿ ಅವಳು ಅವಿದ್ಯಾವಂತ, ಕಂದಾಚಾರಿಗಳ ನಡುವೆ ಉಸಿರುಗಟ್ಟಿಸುವಂಥ ವಾತಾವರಣದಲ್ಲಿ ಜೀವನ ಎದುರಿಸಬೇಕಾಯಿತು. ಅಲ್ಲಿಂದ ಅವಳು ಹೊಸ ಹಾದಿ ಕಂಡು ಕೊಂಡದ್ದಾದರೂ ಹೇಗೆ......?
``ಅಪ್ಪಾಜಿ.... ಖಂಡಿತಾ ನನಗೆ ಈ ಮದುವೆ ಬೇಡ! ಪ್ಲೀಸ್, ನನ್ನ ಮಾತು ಅರ್ಥ ಮಾಡಿಕೊಳ್ಳಿ.....''
``ಏನು ಹೇಳ್ತಿದ್ದೀಯಮ್ಮ ನೀನು.... ಆ ಸುರೇಂದ್ರನಿಗೆ ಏನು ಕಡಿಮೆ ಆಗಿದೆ ಅಂತ? ಅಂದಗಾರ, ಸ್ಮಾರ್ಟ್ ಪರ್ಸನಾಲಿಟಿ.... ಒಳ್ಳೆ ಆಸ್ತಿವಂತರ ಮನೆ ಹುಡುಗ...... ಊರಲ್ಲಿ ಅವರ ಹೊಲಗದ್ದೆಗಳಿಗೆ ಏಕೈಕ ವಾರಸುದಾರ. 3 ಮಹಡಿಗಳ ಭವ್ಯ ಮಹಲಿನ ಮನೆ, ಅದೂ ಸ್ವಂತದ್ದು! ಆಳುಕಾಳು, ಓಡಾಟಕ್ಕೆ ಕಾರು.... ಇನ್ನೇನಮ್ಮ ಕಡಿಮೆ? ಮನೆ ತುಂಬಾ ಹಸು, ಕರು, ಬೆಳ್ಳಿ ಚಿನ್ನ.... ಯಾವುದಕ್ಕೂ ಕೊರತೆ ಇಲ್ಲದ ಸಂಪತ್ತು. ನಾವು ಅನುಕೂಲಸ್ಥರು.... ಆದರೆ ಅವರು ನಮಗಿಂತ 10 ಪಟ್ಟು ಶ್ರೀಮಂತರು,'' ಅಪ್ಪಾಜಿ ತುಸು ಕೋಪದಲ್ಲೇ ಹೇಳಿದರು.
``ಆದರೆ ಅಪ್ಪಾಜಿ.... ಸುರೇಂದ್ರ ಬರಿ 10ನೇ ಕ್ಲಾಸ್ ಓದಿದವರು. ಆತನಿಗೆ ಸರಿಯಾಗಿ ಇಂಗ್ಲಿಷ್ ಸಹ ಬರಲ್ಲ.... ಜೊತೆಗೆ ನನಗಿಂತ 8-10 ವರ್ಷ ದೊಡ್ಡವರು..... ನಾನು ಗ್ರ್ಯಾಜುಯೇಟ್! ನಮ್ಮಿಬ್ಬರ ಈಡುಜೋಡು ಸರಿಹೋದೀತೇ....?''
``ಮಂಜು.... ಒಂದು ವಿಷಯ ನೆನಪಿಡು. ಅಪ್ಪಾಜಿ ಏನೇ ಮಾಡಿದರೂ ಅದು ನಿನ್ನ ಒಳ್ಳೆಯದಕ್ಕೆ. ಓದಿನ ವಿಷಯ ಒಂದು ದೊಡ್ಡ ಚರ್ಚಾಸ್ಪದ ವಿಷಯವೇ? ಹುಡುಗ ಇಷ್ಟೆಲ್ಲ ಅನುಕೂಲಸ್ಥ ಆಗಿರುವಾಗ, ಅಂಥ ಒಳ್ಳೆ ಮನೆತನ ಅಂತಿರೋವಾಗ, ನೀನು ಅನಗತ್ಯ ವಿಷಯಕ್ಕೆ ಮಹತ್ವ ಕೊಟ್ಟು ಒದಗಿಬಂದ ಈ ಸಂಬಂಧಕ್ಕೆ ಕಲ್ಲು ಹಾಕಬೇಡಮ್ಮ...... ಹೆಣ್ಣು ಹೆತ್ತವರ ಜವಾಬ್ದಾರಿ ಗುರುತರವಾದುದು ಕಣಮ್ಮ. ಮಗಳನ್ನು ಒಳ್ಳೆ ಮನೆಗೆ ಸೇರಿಸಿದಿವಿ ಅಂತ ನಮಗೂ ಒಂದು ಸಾರ್ಥಕತೆ ಇರಬೇಕು ತಾನೇ....'' ಅಮ್ಮ ಸ್ಟ್ರಿಕ್ಟ್ ಆಗಿ ಅವಳು ಒಪ್ಪುವಂತೆ ಮನವೊಲಿಸಿದರು.
``ಅಮ್ಮ.... ನಿಮಗೆಲ್ಲ ಗೊತ್ತಿರುವ ಹಾಗೆ ನನಗೆ ಇನ್ನೂ ಪಿ.ಜಿ ಮಾಡುವ ಮನಸ್ಸಿದೆ..... ನನ್ನ ರಿಸರ್ಚ್ ಗೆ ಇನ್ನೂ 2-3 ವರ್ಷ ಬೇಕು. ಅಷ್ಟರಲ್ಲಿ ಈ ಮದುವೆ ಬಂಧನ, ಸಂಸಾರದ ಜಂಜಾಟ, ಜವಾಬ್ದಾರಿ.... ಮುಂದೆ ನಮ್ಮದೇ ಕಾಲೇಜಿನಲ್ಲಿ ಪ್ರಾಧ್ಯಾಪಕಿಯಾಗಿ ನಂತರ ಪ್ರಿನ್ಸಿಪಾಲ್ ಆಗಬೇಕೂಂತ ಕನಸು ಕಾಣುತ್ತಿದ್ದೇನೆ. ನನ್ನ ಸ್ವಂತ ಸಂಪಾದನೆಯಲ್ಲಿ ನನ್ನ ಕಾಲ ಮೇಲೆ ನಾನು ನಿಲ್ಲುವುದು ಬೇಡವೇ?'' ಮಂಜುಳಾ ಈಗಲೂ ವಾದ ನಿಲ್ಲಿಸಲಿಲ್ಲ.
``ಅಯ್ಯೋ.... ಸಾಕು ಬಿಡಮ್ಮ ನಿನ್ನ ಓದು, ವಿದ್ಯಾಭ್ಯಾಸ! ಆ ಕಾಲದಿಂದ ಈ ಕಾಲದವರೆಗೂ ಬರೀ ಓದು ಓದೇ ಆಗೋಯ್ತು. ಇನ್ನಾದರೂ ಈ ಅತಿ ಮಾಡರ್ನ್ ವ್ಯಾಮೋಹಗಳಿಂದ ಹೊರಗೆ ಬಾ. ಹೆಣ್ಣಾಗಿ ಹುಟ್ಟಿದ ಮೇಲೆ ಮದುವೆ ಬೇಡ ಅಂದ್ರೆ ಆಗುತ್ತದೆಯೇ? ಹಣ ಸಂಪಾದನೆ ಒಂದೇ ಅವಳಿಗೆ ಪ್ರಧಾನವಲ್ಲ. ಈ ಸಂಬಂಧದಲ್ಲಿ ಕೋಟ್ಯಂತರ ಆಸ್ತಿ ಕೊಳ್ಳೆ ಹೋಗ್ತಿದೆ. ಅವರಿಗೂ ಕಲಿತ ಹುಡುಗಿಯೇ ಬೇಕಂತೆ. ಕೆಲಸ, ಓಡಾಟ, ಅಂತ ನೀನು ಸಂಪಾದನೆಗಾಗಿ ಅಂಡಲೆಯಬೇಕೇ?
