ಬಹಳ ಅದೃಷ್ಟವಂತರು ನೀವು ನಾವಿಲ್ಲಿ ಕಣ್ಣು ಬಿಟ್ಕೊಂಡು ಕಾಯ್ತಿದ್ದೀವಿ. ಆದರೆ ಕಳ್ಳರ ದೃಷ್ಟಿ ನಮ್ಮ ಮೇಲಿನ್ನೂ ಬಿದ್ದಿಲ್ಲ.
ಒಮ್ಮೆ ಹೀಗಾಯಿತು. ನಮ್ಮ ಅಕ್ಕಪಕ್ಕದ ಮನೆಗಳಲ್ಲಿ ಕಳ್ಳತನಗಳಾದವು. ಕಳ್ಳತನಗಳು ಯಾವುದೇ ಯೋಜನಾಬದ್ಧ ರೀತಿಯಲ್ಲಿ ನಡೆದಿದ್ದರೆ ಯಾರಿಗೂ ಆಶ್ಚರ್ಯವಾಗುತ್ತಿರಲಿಲ್ಲ. ಆದರೆ ಕಳ್ಳರು ಎಂತಹ ಪೆದ್ದರೆಂದರೆ, ಒಂದು ದಿನ ಒಬ್ಬರ ಮನೆಗೆ ನುಗ್ಗಿ ಕಳ್ಳತನ ಮಾಡಿದ್ದರೆ ಮೂರನೆಯ ದಿನ ಅದೇ ಮನೆಗೆ ಕನ್ನ ಹಾಕಲು ಹೋಗುತ್ತಿದ್ದರು. ಅದರಿಂದಾಗಿ ಅವರೇ 2 ದಿನಗಳ ಹಿಂದೆ ರದ್ದಿಯೆಂದು ಬಿಟ್ಟುಹೋಗಿದ್ದ ಅಮೂಲ್ಯ ವಸ್ತುಗಳು ಸಿಗುತ್ತಿದ್ದವು. ಉದಾಹರಣೆಗೆ ಪ್ರಸಿದ್ಧ ಲೇಖಕರ ಕೃತಿಗಳು.
ನಮ್ಮ ಏರಿಯಾದ ಒಬ್ಬ ಮಹಾನುಭಾವರು ಎಚ್ಚರಿಕೆ ವಹಿಸಿ ತಮ್ಮ ಮನೆಯ ಗೇಟಿಗೆ ಒಂದು ರಟ್ಟಿನಲ್ಲಿ ಹೀಗೆ ಬರೆದು ಸಿಕ್ಕಿಸಿದ್ದರು, ``ಈ ಮನೆಯಲ್ಲಿ ಒಂದು ಬಾರಿ ಕಳ್ಳತನ ಆಗಿದೆ. ದಯವಿಟ್ಟು ಇನ್ನು ಬೇರೆ ಯಾವುದಾದರೂ ಮನೆ ನೋಡಿಕೊಳ್ಳಿ. ಈ ಏರಿಯಾದಲ್ಲಿ ಇನ್ನೂ ಬಹಳಷ್ಟು ಉಳ್ಳವರ ಮನೆಗಳಿವೆ.''
ನಾನು ಆ ಬಗ್ಗೆ ವಿಚಾರಿಸಿದಾಗ ಅವರು ಹೀಗೆ ಹೇಳಿದರು, ``ಈಗೀಗ ಕಳ್ಳರೂ ಕಳ್ಳತನದ ಡೆಮಾಕ್ರಸಿ ಅರ್ಥ ಮಾಡಿಕೊಂಡಿದ್ದಾರೆ. ಬಾಗಿಲನ್ನು ತಟ್ಟದೆ ತಮ್ಮ ಕೆಲಸ ಮಾಡುತ್ತಿದ್ದಾರೆ.'' ಆಗ ನನ್ನ ಏಕಮಾತ್ರ ಅದ್ವಿತೀಯ ಹೆಂಡತಿ ಹಣೆಗೆ, ಗಲ್ಲಕ್ಕೆ ಹೊಡೆದುಕೊಂಡು ಹೇಳಿದಳು, ``ಛೆ, ಈ ಮನೆಗೆ ಬಂದು ನನ್ನ ಭಾಗ್ಯವೇ ಬರಡಾಗಿ ಹೋಯ್ತು. ಯಾಕಾದರೂ ಈ ಮನೆಗೆ ಬಂದೆನೋ?''
ನಾನು ಹೇಳಿದೆ, ``ಬಿಡೆ, ಇದಂತೂ ಹೆಂಡತಿಯರು ಶತಮಾನಗಳಿಂದ ಹೇಳಿಕೊಂಡು ಬಂದಿರೋ ಹಳೆ ಡೈಲಾಗ್‌. ನೀನಂತೂ ಯಾವಾಗಲೂ ಇದನ್ನು ಗೊಣಗ್ತಾನೇ ಇರ್ತೀಯ.''
``ರೀ ನಾನು ನಿಮ್ಮ ಹೆಂಡ್ತಿ. ನನ್ನ ಆಸೆ ಎಲ್ಲಿ ಪೂರೈಸ್ತೀರಿ? ನೀವಂತೂ ಯಾವಾಗಲೂ ನನ್ನನ್ನು ತಮಾಷೆ ಮಾಡ್ತಾನೇ ಇರ್ತೀರಿ,'' ಅವಳೆಂದಳು.
``ಹೂಂ, ತಮಾಷೆ ಏನು ಮಾಡೋದು? ಅದೂ ಮದುವೆ ಆದಮೇಲೆ! ಆಯ್ತು. ಅಪ್ಪಣೆಯಾಗಲಿ.''
``ಏನು ಅಪ್ಪಣೆಯಾಗಲಿ? ಎಲ್ಲ ಮನೆಗಳಲ್ಲೂ ಕಳ್ಳತನಗಳು ಆಗುತ್ತಿವೆ. ಆದರೆ ನಮ್ಮ ದುರದೃಷ್ಟ ನೋಡಿ. ಒಬ್ಬ ಕಳ್ಳನೂ ಬರ್ತಿಲ್ಲ.''
ಆಗ ನಾನು ಹೇಳಿದೆ, ``ಅಲ್ಲಾ ಕಣೆ, ನೀನು ಈ ಮನೇಲಿ ಇರೋವಾಗ ಇನ್ನು ಬೇರೆ ಕಳ್ಳರ ಅಗತ್ಯವಾದರೂ ಏನಿದೆ?''
ನನ್ನ ಜೇಬಿನಲ್ಲಿದ್ದ ದುಡ್ಡನ್ನು ನನ್ನ ಹೆಂಡತಿ ತನ್ನ ಖಾತೆಗೆ ಆಗಾಗ ವರ್ಗಾಯಿಸಿ ಕೊಳ್ಳುತ್ತಿರುತ್ತಾಳೆ. ಏಕೆಂದರೆ ಮದುವೆಯಲ್ಲಿ ಪವಿತ್ರ ಅಗ್ನಿಯ ಮುಂದೆ ಸಪ್ತಪದಿ ಹಾಕುತ್ತಿದ್ದಾಗ ನಾವಿಬ್ಬರೂ ಪರಸ್ಪರರ ಸುಖದುಃಖಗಳಲ್ಲಿ ಪಾಲ್ಗೊಳ್ಳುತ್ತೇವೆಂದು ಪ್ರತಿಜ್ಞೆ ಮಾಡಿದ್ದೆ.
ಆ ಪ್ರತಿಜ್ಞೆಯನ್ನು ನಾವಿಬ್ಬರೂ ಸರಿಯಾಗಿ ನಿರ್ವಹಿಸುತ್ತಿದ್ದೆ. ವ್ಯತ್ಯಾಸ ಏನೆಂದರೆ ಅವಳು ದುಃಖ ಕೊಡುತ್ತಿರುತ್ತಾಳೆ. ಸುಖ ಕೊಡುವ ಕರ್ತವ್ಯ ನನ್ನದಾಗಿದೆ. ಆದರೆ ನಾನು ಮನೆಯ ಈ ಕಳ್ಳ ಸಂಗಾತಿಯ ಬಗ್ಗೆ ಏನೂ ಮಾತಾಡುವಂತಿಲ್ಲ. ಏಕೆಂದರೆ ಗೃಹಸ್ಥ ಜೀವನ ಒಂದು ರೀತಿಯಲ್ಲಿ ಚದುರಂಗವಿದ್ದಂತೆ. ಈ ಚದುರಂಗದಲ್ಲಿ ಸೋಲು ಯಾವಾಗಲೂ ಪತಿಯದ್ದೇ ಆಗಿರುತ್ತದೆ. ನಾನು ಅವಳಿಗೆ ಹೀಗೆ ಹೇಳಿದೆ, ``ಪ್ರಿಯೆ, ಕಳ್ಳನನ್ನು ವ್ಯವಸ್ಥೆ ಮಾಡುವುದು ನನಗೆ ಚಿಟಿಕೆ ಹೊಡೆದಂತೆ, ನಾನು ಸಮಾಜದಲ್ಲಿ ಒಬ್ಬ ಪ್ರಭಾವಶಾಲಿ ವ್ಯಕ್ತಿ. ಈಗಲೇ ಪೊಲೀಸ್‌ ಸ್ಟೇಷನ್‌ಗೆ ಫೋನ್‌ ಮಾಡಿದರೆ ಅರ್ಧ ಗಂಟೆಯಲ್ಲಿ 5-6 ಕಳ್ಳರು ಬಂದುಬಿಡ್ತಾರೆ. ಅಲ್ಲಂತೂ ಕಳ್ಳರ ದೊಡ್ಡ ಗ್ಯಾಂಗ್‌ ಇರುತ್ತೆ.''
