ನೀಳ್ಗಥೆ - ವಿಶಾಲಾಕ್ಷಿ ಮೂರ್ತಿ
ಕೋಮಲ ಭಾವನೆಗಳನ್ನು ಹೊಂದಿದ್ದ ಅತಿ ಮೃದು ಸ್ವಭಾವದ ಮರಿಯಾ, ತನ್ನ ಇಂದು ಹಾಗೂ ನಾಳೆ ಖುಷಿಯಿಂದ ತುಂಬಿರಲಿ ಎನ್ನುವ ಪ್ರಯತ್ನದಲ್ಲಿ ತಲ್ಲೀನಳಾಗಿದ್ದಳು. ಇಂದು ಅವಳು ಬಹಳ ಸಂತೋಷವಾಗಿದ್ದಳು. ಇಡೀ 3 ವರ್ಷ ಕಳೆದ ಮೇಲೆ ಅವಳ ಮಗಳು ಮಾರ್ಗರೇಟ್‌ ಅಮೆರಿಕಾದಲ್ಲಿ ವಿದ್ಯಾಭ್ಯಾಸ ಮುಗಿಸಿ ಬೆಂಗಳೂರಿಗೆ ಮರಳುತ್ತಿದ್ದಳು. ತನ್ನ ಪತಿ ಡೇವಿಡ್‌ 5 ವರ್ಷಗಳ ಹಿಂದೆ ಅಪಘಾತದಲ್ಲಿ ತೀರಿಕೊಂಡಾಗ, ಸದಾ ದುಃಖದಲ್ಲಿದ್ದವಳು ಇಷ್ಟು ವರ್ಷಗಳ ನಂತರ ಒಂದಿಷ್ಟು ಖುಷಿ ಕಂಡಿದ್ದಳು.
ಮಾರ್ಗರೇಟ್‌ ಈ ಮನೆಯ ಹಿರಿಯ ಮಗಳು, ಮುದ್ದಿನ ಕಣ್ಮಣಿ ಎನಿಸಿದ್ದಳು. ಅವಳ ನಗು, ಸರಳ ಸ್ವಭಾವದಿಂದ ಎಲ್ಲರ ಮನ ಗೆದ್ದಿದ್ದಳು. ಅವಳು ಉನ್ನತ ವ್ಯಾಸಂಗಕ್ಕಾಗಿ ಅಮೆರಿಕಾಗೆ ಹೋದ ಮೇಲೆ ಮನೆಯಲ್ಲಿ ಶೂನ್ಯ ಆವರಿಸಿತ್ತು. ತನ್ನ ಮನೆಯ ಬೆಳಕು ಮರಳಿ ಕಾಂತಿ ಚೆಲ್ಲಲಿದೆ ಎಂದು ಸಂಭ್ರಮಿಸುತ್ತಾ ಮರಿಯಾ ಎಲ್ಲೆಡೆ ಓಡಾಡುತ್ತಿದ್ದಳು.
ನ್ಯೂಯಾರ್ಕಿಗೆ ಹೋಗುವ ಮೊದಲು ಮಾರ್ಗರೇಟ್‌ ಅಮ್ಮನಿಗೆ ಬಹಳ ಧೈರ್ಯ ತುಂಬಿದ್ದಳು, ``ಅಮ್ಮ, ನಾನು ನಿನ್ನ ಧೈರ್ಯಶಾಲಿ ಮಗಳು ಅನ್ನೋದನ್ನು ಮರೆಯಬೇಡ. ನಿನ್ನಂತೆಯೇ ನಾನು ಸ್ವಾವಲಂಬಿ ಆಗಬಯಸುತ್ತೇನೆ. ಮುಂದಿನ ದಿನಗಳಲ್ಲಿ ನಿನಗೆ ನನ್ನ ಬಗ್ಗೆ ಹೆಚ್ಚು ಹೆಮ್ಮೆ ಮೂಡುತ್ತದೆ, ನೋಡುತ್ತಾ ಇರು.''
ಆಗ ಮರಿಯಾ ಮನದಲ್ಲೇ ದೇವರನ್ನು ಪ್ರಾರ್ಥಿಸಿದಳು, ಮಗಳ ಬಯಕೆಗಳು ಈಡೇರಲಿ ಅಂತ. ಡೇವಿಡ್‌ ಅಪಘಾತದಲ್ಲಿ ತೀರಿಕೊಂಡಿದ್ದೇ ಬಂತು, ಮರಿಯಾ ಜೀವನದಲ್ಲಿ ಸಂಪೂರ್ಣ ಕುಸಿದುಹೋಗಿದ್ದಳು. ಅವನು ರಸ್ತೆ ಅಪಘಾತದಲ್ಲಿ ಅಲ್ಲೇ ಹೋಗಿಬಿಟ್ಟನೆಂದು ತಿಳಿದಾಗ ಅವಳ ಜಂಘಾಬಲವೇ ಉಡುಗಿಹೋಗಿತ್ತು. ಡೇವಿಡ್‌ ತೀರಿಕೊಂಡ ನಂತರ ತನ್ನ ಇಬ್ಬರು ಹೆಣ್ಣುಮಕ್ಕಳ ಸಂಪೂರ್ಣ ಜವಾಬ್ದಾರಿ ಮರಿಯಾಳ ಹೆಗಲಿಗೇರಿತು.
ಮೊದಲಿನಿಂದಲೇ ಡೇವಿಡ್‌ನ ಗಾರ್ಮೆಂಟ್‌ ಬಿಸ್‌ನೆಸ್‌ನಲ್ಲಿ ಮರಿಯಾ ಸಹಾಯ ಮಾಡುತ್ತಿದ್ದುದು ಒಳ್ಳೆಯದಾಯಿತು. ಅದೇ ಬಿಸ್‌ನೆಸ್‌ ಈಗ ಇವಳ ಕೈ ಹಿಡಿಯಿತು. ಹೀಗಾಗಿ ಆರ್ಥಿಕವಾಗಿ ದೊಡ್ಡ ನಷ್ಟ ಏನೂ ಆಗಲಿಲ್ಲ. ಆದರೆ ಅತ್ತ ಬಿಸ್‌ನೆಸ್‌ ಇತ್ತ ಇಬ್ಬರು ಹೆಣ್ಣುಮಕ್ಕಳ ಸಂಸಾರದ ರಥ ಎಳೆಯುವುದು ಖಂಡಿತಾ ಅವಳಿಗೆ ಸುಲಭವಾಗಿರಲಿಲ್ಲ. ಅಂತೂ ದಿಟ್ಟೆಯಾಗಿ ಬದುಕನ್ನು ಬಂದಂತೆ ಎದುರಿಸಿದಳು.
ಆಗ ಹಿರಿ ಮಗಳು ಮಾರ್ಗರೇಟ್‌ 10ನೇ ಹಾಗೂ ಕಿರಿಮಗಳು ಏಂಜಲ್ 8ನೇ ತರಗತಿ ಓದುತ್ತಿದ್ದರು. ಆಗ ಮಾರ್ಗರೇಟ್‌ ಅಮ್ಮನಿಗೆ ಬಲಗೈ ಆಗಿ ಸಹಾಯಕ್ಕೆ ನಿಂತಳು. ದಿಢೀರ್‌ ಎಂದು ಎದುರಾದ ಪರಿಸ್ಥಿತಿಗೆ ಅವಳು ಪರಿಪಕ್ವಳಾದಳು. ತನ್ನ ಓದಿನ ಜೊತೆ ಜೊತೆಗೆ ಮನೆಯ ಜವಾಬ್ದಾರಿಯನ್ನೂ ನಿರ್ವಹಿಸತೊಡಗಿದಳು.
ಮಾರ್ಗರೇಟ್‌ ಓದಿನಲ್ಲಿ ಸದಾ ಮುಂದು. 2 ವರ್ಷಗಳ ನಂತರ ಪಿ.ಯು.ಸಿಯಲ್ಲಿ ಇಡೀ ಕಾಲೇಜಿಗೆ ಟಾಪರ್‌ ಎನಿಸಿದಳು. ಒಂದು ಟ್ಯಾಲೆಂಟ್‌ ಸರ್ಚ್‌ ಕಾಂಪಿಟಿಷನ್‌ನಿಂದ ಅವಳಿಗೆ ನ್ಯೂಯಾರ್ಕ್‌ಗೆ ಹೋಗಿ ಬಿಸ್‌ನೆಸ್‌ ಸ್ಟಡೀಸ್‌ ಮುಂದುವರಿಸಲು ಸ್ಕಾಲರ್‌ಶಿಪ್‌ ದೊರೆಯಿತು.
ಆದರೆ ಮರಿಯಾಗೆ ಮಗಳು ಸಪ್ತ ಸಾಗರ ದಾಟಿ ಅಷ್ಟು ದೂರ ಹೋಗಿ ಒಬ್ಬಂಟಿಯಾಗಿ ಕಲಿಯುವುದು ಒಳ್ಳೆಯದು ಎನಿಸಲಿಲ್ಲ. ಆದರೆ ಮಗಳ ಹಠದ ಮುಂದೆ ಅವಳು ಮಣಿಯಲೇಬೇಕಾಯಿತು. ಮಗಳು ಹೆಚ್ಚಿನ ಓದು ಕಲಿತು ಕೀರ್ತಿ ಸಂಪಾದಿಸಲಿ ಎಂದು ಮರಿಯಾ ಕೊನೆಗೆ ಒಪ್ಪಿಗೆ ನೀಡಿದಳು.
