ಪತಿಯ ಅಕಾಲಿಕ ಮರಣದ ನಂತರ ಶಾರ್ವರಿ ಆಂತರಿಕವಾಗಿ ಬಹಳ ಕುಗ್ಗಿಹೋಗಿದ್ದಳು. ನಂತರ ಅವಳ ಜೀವನದಲ್ಲಿ ಪ್ರತೀಕ್ ಒಂದು ಆಶಾಕಿರಣವಾಗಿ ಮೂಡಿ ಬಂದಿದ್ದ. ಆದರೆ ಅವನ ಕಾಕದೃಷ್ಟಿ ಅವಳ ಅಪಾರ ಸಂಪತ್ತಿನ ಕಡೆ ಸೀಮಿತವಾಗಿತ್ತೇ......?
ಸುಮಾರು ದಿನಗಳಿಂದ ಅನಾರೋಗ್ಯದಿಂದ ಹೇಗೋ ದಿನ ದೂಡುತ್ತಿದ್ದ ಪತಿ ಅವಿನಾಶ್, ಮಾರನೇ ಬೆಳಗ್ಗೆ 8 ಗಂಟೆ ಆದರೂ ಎಚ್ಚರಗೊಳ್ಳದಿದ್ದಾಗ ಶಾರ್ವರಿ ನಿಜಕ್ಕೂ ಬೆಚ್ಚಿಬಿದ್ದಳು. ಅವಳು ಬಂದು ಅವನನ್ನು ಎಬ್ಬಿಸಲು ಯತ್ನಿಸುತ್ತಾ ಹಣೆ ಮುಟ್ಟಿ ನೋಡಿದಳು. ಇಂದು ಅದು ಕೆಂಡದಂತೆ ಸುಡುತ್ತಿತ್ತು. 3-4 ದಿನಗಳಿಂದ ಅವನು ಸತತ ಕೆಮ್ಮುತ್ತಿದ್ದ. ಡಾಕ್ಟರ್ ಮನೆಗೇ ಬಂದು ಪರೀಕ್ಷಿಸಿ ಔಷಧಿ ನೀಡಿದ್ದರು. ನಾನು ಆಸ್ಪತ್ರೆ ಸೇರಿ ಅಡ್ಮಿಟ್ ಆಗಲಾರೆ ಎಂದು ಅವನು ಹಠ ಹಿಡಿದಿದ್ದ. ಸ್ವಲ್ಪ ಆರಾಮ ಎನಿಸಿದಾಗ ಲ್ಯಾಪ್ ಟಾಪ್ ಎಳೆದುಕೊಂಡು, ಮನೆಯಿಂದಲೇ ತನ್ನ ಬಿಸ್ ನೆಸ್ ಸಂಭಾಳಿಸುತ್ತಿದ್ದ. ಅವನ ಫೋನ್ ಕಾಲ್ಸ್ ಅಂತೂ ನಿಲ್ಲುತ್ತಲೇ ಇರಲಿಲ್ಲ. ತಕ್ಷಣ ಅವಳು ಗಂಡನಿಗೆ ಔಷಧಿ ನೀಡಿ, ಹಣೆಗೆ ತಣ್ಣೀರು ಪಟ್ಟಿ ಹಾಕಿ ಬದಲಿಸುತ್ತಿದ್ದಳು.
ಇವರಿಬ್ಬರ ಮದುವೆ ಆಗಿ 2 ವರ್ಷ ಆಗಿರಬಹುದಷ್ಟೆ. ಹಿಂದಿನ ವರ್ಷದವರೆಗೂ ಇವಳ ಅತ್ತೆ ಮಾವ ಇವರ ಜೊತೆ ಬೆಂಗಳೂರಿನಲ್ಲೇ ಇದ್ದರು. ಆದರೆ ಕೊರೋನಾ ಮಧ್ಯೆ ಶಾರ್ವರಿಯ ಹಿರಿಯ ಓರಗಿತ್ತಿ ಸೀರಿಯಸ್ ಆಗಿ ತೀರಿಕೊಂಡಾಗ, ಅವಳ ಅತ್ತೆ ಮಾವ ಬೇರೆ ದಾರಿ ಇಲ್ಲದೆ ಮೈಸೂರಿನ ಹಿರಿ ಮಗನ ಮನೆಗೆ ಹೊರಡಬೇಕಾಯಿತು. ಅಲ್ಲಿ ಆ ಎರಡು ಮೊಮ್ಮಕ್ಕಳ ಜವಾಬ್ದಾರಿ ಅವರ ಮೇಲೇ ಬಂತು.
ಅದಾದ ಮೇಲೆ ಭಾರತದಲ್ಲಿ ಎಲ್ಲೆಡೆ ಕೊರೋನಾದ ಪ್ರಕೋಪ ತೀವ್ರ ಹೆಚ್ಚಿತು. ಬೆಂಗಳೂರಿನ ಎಲ್ಲಾ ಆಸ್ಪತ್ರೆಗಳಲ್ಲೂ ಕೊರೋನಾದ ರೋಗಿಗಳೇ ತುಂಬಿಹೋಗಿದ್ದರು. ಟಿವಿಯ ನ್ಯೂಸ್ ನೋಡುತ್ತಿದ್ದಷ್ಟೂ ಇವರ ಆತಂಕ ಹೆಚ್ಚುತ್ತಿತ್ತು. ಒಂದೆಡೆ ವೆಂಟಿವೇಟರ್ ಇಲ್ಲ, ಕೆಲವೆಡೆ ಆಕ್ಸಿಜನ್ ಸಿಲಿಂಡರ್ ಗಳಿಲ್ಲದೆ ರೋಗಿಗಳ ಸಾವಿನ ಸಂಖ್ಯೆ ಮುಗಿಲು ಮುಟ್ಟಿತ್ತು. ಈ ಮಧ್ಯೆ ಅವಿನಾಶ್ ಹೀಗೆ ಮಲಗಿದಾಗ ಶಾರ್ವರಿಯ ಜಂಘಾಬಲವೇ ಉಡುಗಿಹೋಗಿತ್ತು.
ಅವಳು ತಕ್ಷಣ ಅಮ್ಮನಿಗೆ ಫೋನ್ ಮಾಡಿದಳು, ``ಅಮ್ಮ, ಬೆಳಗ್ಗೆಯಿಂದ ಅವವಿಗೆ ಬಹಳ ಜ್ವರ ಹೆಚ್ಚಾಗಿದೆ! ಏನು ಮಾಡಲಿ?''
ಕಾವೇರಮ್ಮ ಸಹ ಕಂಗಾಲಾದರು, ``ಯಾಕೋ ಎಲ್ಲಾ ಕಡೆ ಇದೇ ಹಾವಳಿ ಕಣಮ್ಮ. ಇಲ್ಲಿ ನಿನ್ನ ತಮ್ಮ ರಾಜು ಸಹ ಕೊರೋನಾ ಪಾಸಿಟಿವ್ ಆಗಿ ತನ್ನ ಕೋಣೆ ಸೇರಿಬಿಟ್ಟಿದ್ದಾನೆ, ಇಲ್ಲದಿದ್ದರೆ ತಕ್ಷಣ ಅನ್ನ ಕಳಿಸಿಕೊಡ್ತಿದ್ದೆ. ನಮಗೀಗ ಅವನ ಸೇವೆ ಮಾಡೋದೇ ಆಗೋಗಿದೆ. ನೀನು ತಕ್ಷಣ ನಿಮ್ಮ ಫ್ಯಾಮಿಲಿ ಡಾಕ್ಟರ್ ನ ಮನೆಗೆ ಕರೆಸಿ, ಅವರ ಸಲಹೆ ಪಡೆದುಕೋ....''
``ಹೌದಮ್ಮ.... ಅತ್ತ ಮೈಸೂರಲ್ಲಿ ನಮ್ಮತ್ತೆಗೂ ಹುಷಾರಿಲ್ವಂತೆ. ಇಲ್ಲಾಂದ್ರೆ ಇವರ ಅಣ್ಣ ಬರ್ತಿದ್ದರು.''
``ಏನೂ ಗಾಬರಿ ಆಗಬೇಡಮ್ಮ. ಸ್ವಲ್ಪ ಧೈರ್ಯದಿಂದ ಇರು.... ಎಲ್ಲಾ ಸರಿಹೋಗುತ್ತದೆ,'' ಎಂದು ಕಾವೇರಮ್ಮ ಸಮಾಧಾನ ಹೇಳಿದರು.
ಶಾರ್ವರಿ ತಕ್ಷಣ ಪತಿಗೆ ಕೊರೋನಾ ಟೆಸ್ಟ್ ಮಾಡಿಸಿದಳು..... ಫ್ಯಾಮಿಲಿ ಡಾಕ್ಟರ್ ರನ್ನು ಕನ್ಸಲ್ಪ್ ಮಾಡಿ, ಅವರ ಸಲಹೆಯಂತೆ ಔಷಧಿ ಮುಂದುವರಿಸಿದ್ದಳು. ಈ ಮಧ್ಯೆ ಅವಿನಾಶ್ ಸ್ಥಿತಿ ಮತ್ತಷ್ಟು ಗಂಭೀರ ಆಗತೊಡಗಿತು. ಕೊನೆಗೆ ಅವನನ್ನು ಆಸ್ಪತ್ರೆಗೇ ಕರೆದುಕೊಂಡು ಹೋದಳು.
