ಎಂದಿನಂತೆ ಇಂದೂ ಕೂಡ ಶೈಲಾ ಬೆಳಬೆಳಗ್ಗೆ ಅಪಾರ್ಟ್‌ ಮೆಂಟ್‌ ನ ಪಾರ್ಕ್‌ ನಲ್ಲಿ ಸುತ್ತಾಡಲೆಂದು ಬಂದಳು. 32 ವರ್ಷದ ಶೈಲಾ ಮುಕ್ತವಾಗಿ ಹರಡಿಕೊಂಡಿದ್ದ ಕೂದಲಿನಲ್ಲೂ ಬಹಳ ಸುಂದರವಾಗಿ ಕಾಣುತ್ತಿದ್ದಳು. ಅವಳು ಗೋದಿ ಮೈಬಣ್ಣದವಳಾಗಿದ್ದರೂ ಅವಳ ಮುಖದ ಮೇಲಿನ ಆತ್ಮವಿಶ್ವಾಸ ಹಾಗೂ ಹೊಳಪು ಅವಳ ವ್ಯಕ್ತಿತ್ವವನ್ನು ಇನ್ನಷ್ಟು ಆಕರ್ಷಕಗೊಳಿಸಿತ್ತು. ಅವಳು ಸಿಂಗಲ್ ಸ್ಮಾರ್ಟ್‌ ಯುವತಿ. ಖಾಸಗಿ ಕಂಪನಿಯೊಂದರಲ್ಲಿ ಉನ್ನತ ಹುದ್ದೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಳು. ಅವಳಿಗೆ ತನ್ನ ಕನಸಿನ ಬಗ್ಗೆ ಪ್ರೀತಿಯಿತ್ತು. 3 ತಿಂಗಳ ಹಿಂದಷ್ಟೇ ಅವಳು ಆ ಅಪಾರ್ಟ್‌ ಮೆಂಟ್‌ ಗೆ ಬಂದಿದ್ದಳು.
ತನ್ನನ್ನು ತಾನು ಫಿಟ್‌ ಹಾಗೂ ಹೆಲ್ದೀ ಆಗಿಟ್ಟುಕೊಳ್ಳಲು ಶೈಲಾ ಎಷ್ಟು ಸಾಧ್ಯವೋ ಅಷ್ಟು ಪ್ರಯತ್ನ ಮಾಡುತ್ತಿದ್ದಳು. ಹೆಲ್ದೀ ಆಹಾರ ಮತ್ತು ಹೆಲ್ದೀ ಲೈಫ್‌ ಸ್ಟೈಲ್ ಅನುಸರಿಸುತ್ತಿದ್ದಳು. ಪ್ರತಿ ಮುಂಜಾನೆ ಲಾಕ್‌ ಗೆ ಹೋಗುತ್ತಿದ್ದಳಾದರೆ, ಸಂಜೆ ಡ್ಯಾನ್ಸ್ ಕ್ಲಾಸ್‌ ಗೆ ಹೋಗುತ್ತಿದ್ದಳು. ಇವತ್ತು ಚಳಿ ಹೆಚ್ಚಿಗೆ ಇದ್ದುದರಿಂದ ಅವಳು ವಾರ್ಮರ್‌ ನ ಮೇಲ್ಭಾಗದಲ್ಲಿ ಒಂದು ಸ್ವೆಟರ್‌ ಕೂಡ ಧರಿಸಿದ್ದಳು. ಲಾಕ್‌ ಮಾಡುತ್ತಲೇ ಅವಳ ದೃಷ್ಟಿ ಯಾರನ್ನೋ ಹುಡುಕುತ್ತಿತ್ತು.
ಪ್ರತಿದಿನದಂತೆ ಇಂದೂ ಆ ಯುವಕ ಎಲ್ಲೂ ಕಾಣಲಿಲ್ಲ. ಅವನು ವಾಸಿಸುತ್ತಿದ್ದುದು ಎದುರುಗಿನ ಫ್ಲಾಟ್‌ ನಲ್ಲಿ. ಪ್ರತಿದಿನ ಇದೇ ಸಮಯಕ್ಕೆ ವಾಕಿಂಗ್‌ ಗೆ ಬರುತ್ತಿದ್ದ. ಟೀ ಶರ್ಟ್‌ ನ ಮೇಲ್ಭಾಗಕ್ಕೆ ತೆಳ್ಳನೆಯ ಜಾಕೆಟ್‌ ಹಾಗೂ ಚಳಿ ಸೀಸನ್‌ ನಲ್ಲೂ ಕೂಡ ಅವನು ಶೈಲಾಗೆ ಬಹಳ ಸ್ಮಾರ್ಟ್‌ ಆಗಿ ಕಂಡುಬರುತ್ತಿದ್ದ.
ಇಬ್ಬರೂ ಅಪರಿಚಿತರಾಗಿದ್ದರು. ಹೀಗಾಗಿ ಇಬ್ಬರೂ ಪರಸ್ಪರರನ್ನು ಕಣ್ಣಂಚಿನಿಂದ ನೋಡುತ್ತಿದ್ದರು ಹಾಗೂ ಮುಂದೆ ಸಾಗುತ್ತಿದ್ದರು. ಕಳೆದ ಕೆಲವು ದಿನಗಳಿಂದ ಇಬ್ಬರ ನಡುವೆ ಮುಗುಳ್ನಗೆಯ ವಿನಿಮಯವಾಗುತ್ತಿತ್ತು. ಇಂದು ಆ ಯುವಕ ಬರದಿರುವುದನ್ನು ಕಂಡು ಶೈಲಾ ಒಂದಷ್ಟು ವಿಚಲಿತಳಾಗಿದ್ದಳು. ಏಕೆಂದರೆ ಹವಾಮಾನ ಎಂಥದ್ದೇ ಇರಲಿ, ಅಂದರೆ ಭೀಕರ ಚಳಿ ಇರಲಿ, ಮಳೆ ಗಾಳಿ ಇರಲಿ ಆ ಯುವಕ ವಾಕಿಂಗ್‌ ತಪ್ಪಿಸುತ್ತಿರಲಿಲ್ಲ.
ಮುಂದಿನ 2 ದಿನಗಳ ಕಾಲ ಆ ಯುವಕ ಕಣ್ಣಿಗೆ ಬೀಳಲಿಲ್ಲ. ಹೀಗಾಗಿ ಅವಳಿಗೆ ಒಂದಿಷ್ಟು ಚಿಂತೆಯಾಯಿತು. ಯಾವುದೇ ಸಂಬಂಧ ಇರದೇ ಇದ್ದರೂ ಕೂಡ ಆ ಯುವಕನಿಗಾಗಿ ಅವಳ ಹೃದಯ ಮಿಡಿಯುತ್ತಿತ್ತು. ಅವನ ಮನೆಯಲ್ಲಿ ಯಾರಾದರೂ ಅನಾರೋಗ್ಯ ಪೀಡಿತರಾಗಿರಬಹುದು ಅಥವಾ ಅವನು ಎಲ್ಲಿಯಾದರೂ ಹೋಗಿರಬಹುದು ಎಂದುಕೊಂಡಳು.
ಮಾರನೇ ದಿನ ಅವನು ಕಂಡುಬಂದಾಗ, ಶೈಲಾ ಒಮ್ಮೆಲೆ ಅವನ ಬಳಿ ಹೋಗಿ, “ನೀವು ಬಹಳ ದಿನಗಳಿಂದ ಕಾಣಲೇ ಇಲ್ಲ…. ಎಲ್ಲ ಸರಿ ಇದೆ ತಾನೇ?” ಎಂದು ಕೇಳಿದಳು.
“ಬಹಳ ದಿನಗಳಿಂದ ಅಲ್ಲ. ಕೇವಲ 2 ದಿನಗಳಿಂದ.”
“ಹ್ಞಾಂ… ಅದನ್ನೇ ಹೇಳುತ್ತಿದ್ದೆ. ಎಲ್ಲವೂ ಸರಿ ಇದೆ ಅಲ್ವಾ?”
“ಎಸ್‌ ಎವೆರಿಥಿಂಗ್‌ ಈಸ್‌ ಫೈನ್‌….. ಥ್ಯಾಂಕ್ಯೂ. ಅಂದಹಾಗೆ ನೀವು ನನ್ನನ್ನು ಅಬ್ಸರ್ವ್ ಮಾಡುತ್ತೀರೆಂದು ನನಗೆ ಇವತ್ತೇ ಗೊತ್ತಾಯ್ತು,” ಎಂದು ತನ್ನ ಹೊಳೆಯುವ ಕಣ್ಣುಗಳಿಂದ ಅವಳನ್ನು ನೋಡುತ್ತಾ ಹೇಳಿದ.
“ಇಲ್ಲ…. ಇಲ್ಲ….. ನಾನು ದಿನ ನಿಮ್ಮನ್ನು ನೋಡ್ತಿದ್ದೆನಲ್ಲ ಹಾಗಾಗಿ ಕೇಳಿದೆ,” ಎಂದು ಶೈಲಾ ಸ್ವಲ್ಪ ನಾಚಿಕೊಂಡಳು.
“ಅಂದಹಾಗೆ ನನ್ನ ಮನೆಗೆಲಸದವಳ ಮಗಳು ಅನಾರೋಗ್ಯಪೀಡಿತಳಾಗಿದ್ದಳು. ಹೀಗಾಗಿ ಹಾಸ್ಪಿಟಲ್ ಓಡಾಟ ನಡೆದಿತ್ತು,” ಎಂದು ಅವನು ಹೇಳಿದ.
“ನೀವು, ನಿಮ್ಮ ಮನೆಗೆಲಸದವರ ತೊಂದರೆಗೆ ಇಷ್ಟು ಸ್ಪಂದಿಸುತ್ತೀರಾ?” ಶೈಲಾ ಆಶ್ಚರ್ಯಚಕಿತಳಾಗಿ ಕೇಳಿದಳು.
“ಅವರೂ ಕೂಡ ನಮ್ಮ ಕುಟುಂಬದ ಸದಸ್ಯರೇ ಅಲ್ವೇ?”
“ನೈಸ್‌, ನಿಮ್ಮ ಮನೆಯಲ್ಲಿ ಮತ್ತೆ ಯಾರ್ಯಾರು ಇದ್ದಾರೆ?”
“ನಾನು ಮತ್ತು ಅಮ್ಮ ಇಬ್ಬರೇ ಇರೋದು. ಹೆಂಡತಿ ಜೊತೆ ವಿಚ್ಛೇದನ ಆಗಿ 3 ವರ್ಷಗಳೇ ಕಳೆದಿವೆ. ಅಂದಹಾಗೆ ನಿಮ್ಮ ಹೆಸರು?” ಎಂದು ಹೇಳುತ್ತಾ ಅವನು ಪರಿಚಯಕ್ಕಾಗಿ ಕೈ ಚಾಚಿದ.
“ನಾನು ಏಕಾಂಗಿಯಾಗಿ ವಾಸಿಸುತ್ತೇನೆ. ಇನ್ನೂ ಮದುವೆಯಾಗಿಲ್ಲ. ನನ್ನ ಹೆಸರು ಶೈಲಾ, ನಿಮ್ಮದು…?”
ಶೈಲಾ ಮುಗುಳ್ನಗುತ್ತಾ ಕೇಳಿದಳು.
`’ಮೈ ಸೆಲ್ಫ್ ರೋಹಿತ್. ನೈಸ್‌ ಟು ಮೀಟ್‌ ಯೂ.”
ಆ ಬಳಿಕ ಇಬ್ಬರೂ ಸಾಕಷ್ಟು ಹೊತ್ತಿನ ತನಕ ಮಾತುಕತೆ ನಡೆಸುತ್ತಿದ್ದರು. ಅರ್ಧ ಗಂಟೆ ಜೊತೆ ಜೊತೆಗೆ ಲಾಕ್‌ ಮಾಡುತ್ತಲೇ ಇಬ್ಬರ ನಡುವೆ ಸಾಕಷ್ಟು ಸ್ನೇಹ ಉಂಟಾಯಿತು. ಮೊಬೈಲ್ ನಂಬರ್‌ ಗಳ ವಿನಿಮಯ ಕೂಡ ಆಯಿತು. ಈಗ ಇಬ್ಬರೂ ಫೋನ್ ನಲ್ಲಿ ಸಹ ಸಂಪರ್ಕದಲ್ಲಿದ್ದರು.
ಕ್ರಮೇಣ ಇಬ್ಬರ ಪರಿಚಯ ಗಾಢ ಸ್ನೇಹದಲ್ಲಿ ಪರಿವರ್ತನೆಯಾಯಿತು. ಇಬ್ಬರಿಗೂ ಪರಸ್ಪರ ಸಾಥ್‌ ಬಹಳ ಇಷ್ಟವಾಗತೊಡಗಿತು. ಇಬ್ಬರೂ ಫಿಟ್ನೆಸ್‌ ಬಗ್ಗೆ ಬಹಳ ಆಸಕ್ತರಾಗಿರುವುದರ ಜೊತೆಗೆ, ಸ್ಟ್ರಾಂಗ್‌ ಮೆಂಟ್‌ ಸ್ಟೇಟಸ್‌ ವುಳ್ಳವರಾಗಿದ್ದರು. ಬೇರೆಯವರ ಬಗ್ಗೆ ಗಮನ ಕೊಡದೇ ಇರುವುದು, ತಮ್ಮ ಕೆಲಸದ ಬಗ್ಗೆ ಹೆಚ್ಚು ಆಸಕ್ತಿ ತೋರಿಸುವುದು ಅವರ ಧೋರಣೆಯಾಗಿತ್ತು. ಸಂಬಂಧಗಳಿಗೆ ಮಹತ್ವ ಕೊಡುವುದು ಕೆಲಸದ ಜೊತೆಗೆ ಸ್ಟೈಲ್ ಆಗಿ ಜೀವನ ನಡೆಸುವದು ಜೀವನದ ಬಗ್ಗೆ ಇಬ್ಬರ ಯೋಚನೆ ಒಂದೇ ರೀತಿಯಾಗಿತ್ತು. ಈಗ ಇಬ್ಬರೂ ಜೊತೆ ಜೊತೆಗೆ ಹೆಚ್ಚು ಸಮಯ ಕಳೆಯುತ್ತಿದ್ದರು. ಸಮಯ ಹೀಗೆಯೇ ಸಾಗುತ್ತಿತ್ತು.
ಇತ್ತ ಅಪಾರ್ಟ್‌ ಮೆಂಟ್‌ ನಲ್ಲಿ ಆ ಇಬ್ಬರ ಸ್ನೇಹ ಬಹಳಷ್ಟು ಜನರಿಗೆ ನುಂಗಲಾರದ ತುತ್ತಾಗಿತ್ತು. ಅದರಲ್ಲೂ ವಿಶೇಷವಾಗಿ ರೋಹಿತ್ ನ ಪಕ್ಕದ ಮನೆಯ ಮಾಲಾ ಬಹಳ ಅಪ್‌ ಸೆಟ್‌ ಆಗಿದ್ದಳು. ಅವಳು ಯಾವಾಗಲಾದರೊಮ್ಮೆ ಶೈಲಾ ಜೊತೆಗೆ ಮಾತನಾಡುತ್ತಿದ್ದಳು. ಆ ದಿನ ಕೂಡ ಶೈಲಾ ತನ್ನ ಮನೆಗೆ ವಾಪಸ್ಸಾಗುತ್ತಿದ್ದಾಗ, ಮಾಲಾಳ ಭೇಟಿಯಾಯಿತು.
ಔಪಚಾರಿಕ ಮಾತುಕತೆಯ ಬಳಿಕ ಮಾಲಾ ತನ್ನದನ್ನು ಹೇಳಲು ಶುರು ಮಾಡಿದಳು, “ರೋಹಿತ್ ನನ್ನು ಒಲಿಸಿಕೊಳ್ಳಲು ನಾನು ಅದೆಷ್ಟು ಪ್ರಯತ್ನಿಸಿದೆ. ಅವನಿಗೆ ಇಷ್ಟವಾಗುವ ತಿಂಡಿ ಮಾಡಿಕೊಂಡು ಅವನ ಫ್ಲಾಟಿಗೆ ಹೋಗುತ್ತಿದ್ದೆ. ಆಗ ನಾನು ನನ್ನ ಕೂದಲನ್ನು ಸ್ಮೂಥ್‌ ನಿಂಗ್‌ ಕೂಡ ಮಾಡಿಕೊಂಡಿದ್ದೆ. ಅವನಿಗಾಗಿ ಎಂತಹ ದುಬಾರಿ ಬಟ್ಟೆಗಳನ್ನು ಕೊಂಡುಕೊಂಡು ಧರಿಸುತ್ತಿದ್ದೆ. ಆದರೆ ಅವನು ಮಾತ್ರ ನನ್ನತ್ತ ತಿರುಗಿ ಕೂಡ ನೋಡಲಿಲ್ಲ. ನಾನೆಷ್ಟು ಸುಂದರಳಾಗಿದ್ದೇನೆ. ಕಾಲೇಜಿನಲ್ಲಿ ನನ್ನನ್ನು ಎಲ್ಲರೂ `ಮಿಸ್‌ ಬ್ಯೂಟಿ’ ಎಂದೇ ಕರೆಯುತ್ತಿದ್ದರು.
“ಮತ್ತೊಂದು ವಿಷಯ, ಅವನು ಯಾವ ಜಾತಿಯವನಾಗಿದ್ದಾನೊ, ನಾನೂ ಕೂಡ ಅದೇ ಜಾತಿಯವಳು. ಆದರೆ ನಮ್ಮಿಬ್ಬರದೂ ಏನೂ ನಡೆಯುತ್ತಿಲ್ಲ. ಅಂದಹಾಗೆ ಅವನು ನಿನ್ನ ಹಿಂದೆ ಸುತ್ತಾಡಲು ನೀನು ಅವನಿಗೆ ಏನು ಮೋಡಿ ಮಾಡಿದೆ?”
“ಏನ್‌ ಹೇಳ್ತಿದ್ದೀರಾ ಮಾಲಾ? ನಿಮ್ಮ ಮಾತಿನ ಅರ್ಥ ಏನು?”
“ಅಂದರೆ ನಿಮ್ಮ ನಡುವೆ ಇಲೂ ಇಲೂ ಹೇಗೆ ಶುರುವಾಯ್ತು?”
“ನೋಡಿ ಮಾಲಾ, ನಮ್ಮಿಬ್ಬರ ನಡುವೆ ಯಾವುದೇ ಇಲೂ ಗಿಲೂ ಏನೂ ಇಲ್ಲ. ಅವರು ನನಗೆ ಒಳ್ಳೆಯ ಫ್ರೆಂಡ್‌ ಆಗಿದ್ದಾರೆಂದಷ್ಟೇ ಗೊತ್ತು. ಅದನ್ನು ಬಿಟ್ಟು ನನಗೆ ಬೇರೇನೂ ಗೊತ್ತಿಲ್ಲ. ಇದರ ಬಗ್ಗೆ ನನಗೆ ನಿಮ್ಮಿಂದಾಗಲಿ ಅಥವಾ ಬೇರೆಯವರಿಂದಾಗಲಿ, ಏನನ್ನೂ ಕೇಳುವ ಆಸಕ್ತಿ ಇಲ್ಲ,” ಎಂದು ಶೈಲಾ ಕಡ್ಡಿ ತುಂಡು ಮಾಡಿದಂತೆ ಹೇಳಿ ತನ್ನ ಮನೆಯೊಳಗೆ ಹೋದಳು.
ಶೈಲಾ ತನ್ನ ಫ್ಲಾಟ್‌ ಗೆ ಹೋಗುತ್ತಿದ್ದಂತೆ ರಚನಾ ಆಂಟಿ ಮಾಲಾಳ ಬಳಿ ಬಂದರು. ಮಾಲಾ ಕೋಪದಿಂದ, “ಆಂಟಿ, ಅವಳ ಅವತಾರ ನೋಡಿ. ಅವಳು ಅಪಾರ್ಟ್‌ ಮೆಂಟ್‌ ಗೆ ಬಂದು ಕೆಲವೇ ತಿಂಗಳುಗಳಾಗಿವೆ. ಅಷ್ಟರಲ್ಲಿ ಆ ಮಾಟಗಾತಿ ರೋಹಿತ್ ನನ್ನು ತನ್ನ ಬಲೆಗೆ ಹಾಕಿಕೊಂಡಿದ್ದಾಳೆ,” ಎಂದಳು.
“ಬಹಳ ಚಾಲಾಕಿ ಹುಡುಗಿ. ತನಗೆ ಈ ವಯಸ್ಸಿನಲ್ಲಿ ಯಾರೂ ಒಳ್ಳೆಯ ಸ್ಮಾರ್ಟ್‌ ಹುಡುಗರು ಸಿಗುವುದಿಲ್ಲವೆಂದು ವಿಚ್ಛೇದಿತ ವ್ಯಕ್ತಿಯನ್ನೇ ತನ್ನ ಬುಟ್ಟಿಗೆ ಹಾಕಿಕೊಂಡಿದ್ದಾಳೆ. ಅವನೂ ನೋಡಿ ಅವಳ ಹಿಂದೆಯೇ ಸುತ್ತಾಡುತ್ತಿರುತ್ತಾನೆ. ನಾನು ನಮ್ಮ ಸ್ನೇಹಾಳಿಗಾಗಿ ಅವನ ಜೊತೆ ಅದೆಷ್ಟೋ ಸಲ ಮಾತಾಡಿದೆವು. ಆದರೆ ಅವನು ಆ ಬಗ್ಗೆ ತನಗೆ ಮದುವೆಯೇ ಬೇಕಿಲ್ಲ ಎಂಬಂತೆ ವರ್ತಿಸುತ್ತಾನೆ.”
“ಸ್ನೇಹಾ ಯಾರು…. ನಿಮ್ಮ ಅಣ್ಣನ ಮಗಳು ಅಲ್ವಾ ಆಂಟಿ?”
“ಹೌದು ಅವಳೇ. ನಮ್ಮ ಮನೆಗೆ ಬಂದಾಗೆಲ್ಲ ಅವಳು ರೋಹಿತ್ ಜೊತೆ ಮಾತನಾಡುತ್ತಾಳೆ. ಅವನ ತಾಯಿ ಜೊತೆಗೂ ಒಳ್ಳೆಯ ಫ್ರೆಂಡ್‌ ಶಿಪ್‌ ಮಾಡಿಕೊಂಡಿದ್ದಾಳೆ. ಆದರೂ ರೋಹಿತ್ ಮಾತ್ರ ಸ್ನೇಹಾ ಜೊತೆ ಬೆರೆಯುವುದಿಲ್ಲ,” ಎಂದರು ರಚನಾ.
“ಆಂಟಿ, ಸ್ನೇಹಾ ಇನ್ನೂ ಚಿಕ್ಕವಳು. ನೀವು ಅವಳಿಗೆ ಬೇರೆ ವರ ಹುಡುಕಿ. ನಾನು ನನ್ನ ಬಗ್ಗೆ ಹೇಳುತ್ತಿದ್ದೆ ನನ್ನಲ್ಲಿ ಏನು ಕಡಿಮೆ ಇದೆ ಹೇಳಿ ನೋಡೋಣ,” ಮಾಲಾ ಕೇಳಿದಳು.
“ಸರಿಯಾಗಿ ಹೇಳಿದೆ ಮಾಲಾ, ನನಗೆ ಸ್ನೇಹಾ ಹೇಗೊ, ನೀನೂ ಕೂಡ ಹಾಗೆಯೇ. ನಮ್ಮ ಸ್ನೇಹಾ ಮದುವೆ ಆಗದಿದ್ದರೂ ಸರಿ. ನೀನಾದರೂ ಮಾಡಿಕೊಂಡರೆ ನನಗೆ ಖುಷಿ ಆಗುತ್ತೆ. ನೀನೂ ಹೂವಿನಂತಹ ಹುಡುಗಿ. ಆದರೆ ಇತ್ತೀಚೆಗೆ ನೀನು ನಿನ್ನ ಬಗ್ಗೆ ಗಮನವನ್ನೇ ಕೊಡ್ತಿಲ್ಲವಲ್ಲ ಏನು ಕಾರಣ? ಬ್ಯೂಟಿ ಪಾರ್ಲರ್‌ ಗೆ ಹೋಗಿಲ್ಲವೇನು?” ಎಂದು ರಚನಾ ಆಂಟಿ ಮಾಲಾಳನ್ನು ಗಮನಿಸುತ್ತಾ ಕೇಳಿದರು.
“ಹೌದು ಆಂಟಿ, ನೀವು ನಿಜವನ್ನೇ ಹೇಳುತ್ತಿರುವಿರಿ. ನಾನು ಇವತ್ತೇ ಬ್ಯೂಟಿಪಾರ್ಲರ್‌ ಹೋಗಿ ಬರ್ತೀನಿ. ಆಗ ನೋಡಿ, ರೋಹಿತ್ ನನ್ನನ್ನು ಬಿಟ್ಟು ಬೇರೆ ಯಾರನ್ನೂ ನೋಡಬಾರದು!”
“ಸರಿ ನಾನೂ ಕೂಡ ನಮ್ಮ ಸ್ನೇಹಾಳಿಗಾಗಿ ಹೊಸ ಫ್ಯಾಷನ್ನಿನ ಬಟ್ಟೆ ಹಾಗೂ ಜ್ಯೂವೆಲರಿ ತೆಗೆದುಕೊಂಡು ಬರುತ್ತೇನೆ,” ಎಂದು ಆಂಟಿ ಹೇಳಿದರು.
ಶೈಲಾ ಹಾಗೂ ರೋಹಿತ್ ಜೊತೆ ಜೊತೆಗೆ ಇರುವುದನ್ನು ನೋಡಿ ಬೇರೆ ಕೆಲವು ಜನರಿಗೂ ಹೊಟ್ಟೆಯುರಿ ಆಗತೊಡಗಿತು. ಶೈಲಾಳ ಮನೆ ಪಕ್ಕದಲ್ಲಿಯೇ ವಾಸಿಸುವ ಅನಸೂಯಾ ಆಂಟಿಗೆ ಶೈಲಾ ಬಹಳ ಹಿಡಿಸಿದ್ದಳು. ಉದ್ಯೋಗಸ್ಥೆ, ಇಷ್ಟೊಂದು ಆತ್ಮವಿಶ್ವಾಸದ ಸುಂದರ ಹುಡುಗಿಯನ್ನು ತನ್ನ ಸೊಸೆಯಾಗಿಸಿಕೊಳ್ಳಲು ಬಹಳ ಕಸರತ್ತು ನಡೆಸಿದ್ದರು. ಅವರ ಏಕೈಕ ಪುತ್ರ ರಮೇಶ್‌ ಗೆ ಬಿಸ್‌ ನೆಸ್‌ ಇದೆ. ಆದರೆ ಅದನ್ನು ಸರಿಯಾಗಿ ನಡೆಸಿಕೊಂಡು ಹೋಗುವ ಚಾಕಚಕ್ಯತೆ ಮಾತ್ರ ಅವನಲ್ಲಿರಲಿಲ್ಲ.
ಶೈಲಾಳನ್ನು ತನ್ನ ಸೊಸೆಯಾಗಿಸಿಕೊಳ್ಳಲು ಅನಸೂಯಾ ಆಂಟಿ ಕಳೆದೆರಡು ತಿಂಗಳಿಂದ ತನ್ನ ಮಗನ ಲುಕ್‌ ಬದಲಿಸಲು ಪ್ರಯತ್ನ ನಡೆಸಿದ್ದರು. ಅವನಿಗೆ ಇತ್ತೀಚೆಗೆ ಸ್ವಲ್ಪ ಬೊಜ್ಜು ಕಾಣಿಸಿಕೊಂಡಿತ್ತು. ಆದರೆ ಅವನು ವ್ಯಾಯಾಮ ಎಂದರೆ ಮಾರುದ್ದ ಸರಿಯುತ್ತಿದ್ದ. ಶೈಲಾ ಜಿಮ್ ಗೆ ಹೋಗುವುದು, ಮುಂಜಾನೆ ವಾಕ್‌ ಹೋಗುವುದನ್ನು ನೋಡಿ ಅವರಿಗೆ ಹೇಗೇಗೋ ಆಗುತ್ತಿತ್ತು.
ಅನಸೂಯಾ ಆಂಟಿ ಮಗನ ಮನವೊಲಿಸಿ ಅವನನ್ನು ಜಿಮ್ ಗೆ ಕಳಿಸಲು ಪ್ರಯತ್ನಿಸುತ್ತಿದ್ದರು. ಇತ್ತೀಚೆಗೆ ಶೈಲಾ ಮತ್ತು ರೋಹಿತ್ ಮುಂಜಾನೆ ಲಾಕ್‌ ಗೆ ಹೋಗುತ್ತಿದ್ದುದು ಆಂಟಿಯ ಮನಸ್ಸಿನಲ್ಲಿ ಕಾಂಪಿಟಿಶನ್‌ ಭಾವನೆಯನ್ನು ಉಂಟು ಮಾಡಿತ್ತು.
ಬೆಳಗ್ಗೆ 7 ಗಂಟೆ ಆದರೂ ಮಗ ಮಲಗಿರುವುದನ್ನು ನೋಡಿ ಕುಪಿತರಾದ ಆಂಟಿ ಅವನ ಹೊದಿಕೆ ಎಳೆಯುತ್ತಾ, “ರೋಹಿತ್‌ಉದ್ದೇಶಪೂರ್ವಕವಾಗಿ ಶೈಲಾಳ ಜೊತೆ ವಾಕ್‌ ಮಾಡುತ್ತಿದ್ದಾನೆ. ನೀನೇನು ಇನ್ನೂ ಹೊದ್ದುಕೊಂಡು ಮಲಗಿದಿಯಲ್ಲೋ? ಬೇಗ ಏಳು, ನೀನೂ ವಾಕ್‌ ಹೋಗು. ಅವಳು ಯಾವ ಜಿಮ್ ಗೆ ಯಾವ ಟೈಮ್ ಗೆ ಹೋಗ್ತಾಳೆ ಪತ್ತೆ ಹಚ್ಚಿ ನೀನೂ ಅದೇ ಸಮಯಕ್ಕೆ ಜಿಮ್ ಗೆ ಹೋಗು,” ಎಂದು ಹೇಳಿದರು.
ಮಗ ಏನೇನೋ ಗೊಣಗುಟ್ಟುತ್ತಾ, ಹೊದಿಕೆಯನ್ನು ಪುನಃ ಎಳೆದುಕೊಳ್ಳುತ್ತಾ, “ನನಗೆ ಜಿಮ್ ಗಿಮ್ ಏನೂ ಬೇಕಿಲ್ಲ ಹೋಗಮ್ಮ,” ಎಂದ.
“ಈಗ್ಲೇ ಎಚ್ಚೆತ್ತುಕೋ, ಅಂತಹ ಹುಡುಗಿ ಮನೆ ಸೊಸೆಯಾಗಿ ಬಂದ್ರೆ ಹಣದ ಸುರಿಮಳೆ ಆಗುತ್ತೆ. ನಿನ್ನ ಬಿಸ್‌ ನೆಸ್‌ ಕೂಡ ಸರಿಯಾಗಿ ನಡೀತಿಲ್ಲ. ಕನಿಷ್ಠ ನಿನ್ನ ಹೆಂಡತಿ ಆಗಿ ಬರುವವಳಾದರೂ ಗಳಿಸಿ ತಂದರೆ ಸಾಕು ಬೇಗ ಏಳು,” ಎಂದು ಆಗ್ರಹಿಸಿದರು.
“ಅಯ್ಯೋ, ಮಮ್ಮಿ ಪ್ರೀತಿ ಒತ್ತಾಯಪೂರ್ವಕವಾಗಿ ಬರೋದಿಲ್ಲ. ಅದೇನಿದ್ರೂ ಮನಸ್ಸಿನಿಂದ ಬರಬೇಕು.”
“ನಿನಗೆ ಯಾವಾಗ ಪ್ರೀತಿ ಬರುತ್ತೇ? ವಯಸ್ಸಾದ ಮೇಲಾ….? ಮುದುಕ ಆದ ಮೇಲೆ ಮದುವೆ ಮಾಡಿಕೊಳ್ತೀಯಾ?”
“ಮಮ್ಮಿ ನಾನು ಅರೇಂಜ್ಡ್ ಮ್ಯಾರೇಜ್‌ ಮಾಡಿಕೊಳ್ತೀನಿ. ಡೋಂಟ್‌ ವರಿ ನನಗೀಗ ಮಲಗೋಕೆ ಬಿಡು…..” ಎಂದು ತಿರುಗಿ ಮುಸುಕೆಳೆದುಕೊಂಡ.
ಆಂಟಿಗೆ ವಿಪರೀತ ಸಿಟ್ಟು ಬಂದಿತು. ಅವರು ಒಂದು ಗ್ಲಾಸ್‌ ನೀರು ತಂದು ಅವನ ಮುಖದ ಮೇಲೆ ಎರಚಿದರೆ, “ಏದ್ದೇಳು, ಜಿಮ್ ಗೆ ಹೋಗು,” ಎಂದರು.
ಶೈಲಾ ಹಾಗೂ ರೋಹಿತ್ ಜೊತೆ ಜೊತೆಗೆ ಇರುವುದನ್ನು ನೋಡಿ ಕೇವಲ ಅನಸೂಯಾ ಆಂಟಿ ಅಷ್ಟೇ ಅಲ್ಲ, ಇನ್ನೂ ಕೆಲವು ಜನ ಶೈಲಾಳನ್ನು ಸೊಸೆ ಅಥವಾ ಹೆಂಡತಿಯಾಗಿ ಮಾಡಿಕೊಳ್ಳಲು ಸ್ಪರ್ಧೆಗಿಳಿದಿದ್ದರು. ಎಲ್ಲರೂ ತಮ್ಮದೇ ಆದ ರೀತಿಯಲ್ಲಿ ಗೆಲ್ಲಲು ತಮ್ಮದೇ ತಂತ್ರ ಹೂಡುತ್ತಿದ್ದರು.
ನೀಲಕಂಠ ರಾಯರಂತೂ ಇನ್ನೂ ಒಂದು ಹೆಜ್ಜೆ ಮುಂದಿದ್ದರು. ಅವರು ನೇರ ಶೈಲಾಳ ಮನೆಗೇ ಹೋಗಿಬಿಟ್ಟರು. ಅವರು ಅದೇ ಅಪಾರ್ಟ್‌ ಮೆಂಟ್‌ ನಲ್ಲಿ ಇದ್ದಾರೆ ಎನ್ನುವುದಷ್ಟೇ ಶೈಲಾಳಿಗೆ ಗೊತ್ತಿತ್ತು. ಅವರು ಯಾವುದೋ ಕಂಪನಿಯಲ್ಲಿ ಮ್ಯಾನೇಜರ್ ಆಗಿದ್ದಾರೆನ್ನುವುದು ಗೊತ್ತಿತ್ತು. ಆದರೆ ದಿಢೀರ್‌ ಎಂದು ಮನೆಗೆ ಬಂದಿದ್ದನ್ನು ನೋಡಿ ಶೈಲಾ ದಂಗಾಗಿ ಹೋದಳು.
ಅವರನ್ನು ಚಹಾ, ಉಪಾಹಾರದ ಬಗ್ಗೆ ವಿಚಾರಿಸಿದ ಬಳಿಕ ಅವರು ಬಂದ ಉದ್ದೇಶವನ್ನು ಕೇಳಿದಳು ಶೈಲಾ.
ಆಗ ನೀಲಕಂಠ ರಾಯರು ಬಹಳ ಉತ್ಸಾಹದಿಂದ ಹೇಳತೊಡಗಿದರು, “ಶೈಲಾ, ನೀನು ಯಾವ ಕಂಪನಿಯಲ್ಲಿ ಕೆಲಸ ಮಾಡ್ತೀಯೋ ಅದೇ ಕಂಪನಿಯಲ್ಲಿ ನನ್ನ ಸ್ನೇಹಿತ ಕೂಡ ಕೆಲಸ ಮಾಡ್ತಾನೆ. ಅವನೇ ನಿನ್ನ ಬಗ್ಗೆ ಹೇಳಿದ್ದು. ಇಷ್ಟೊಂದು ಚಿಕ್ಕ ವಯಸ್ಸಿನಲ್ಲಿ ನೀನು ಅಷ್ಟು ದೊಡ್ಡ ಹುದ್ದೆಗೆ ಏರಿರುವುದು ನಿಜಕ್ಕೂ ಬೆರಗು ಮೂಡಿಸುವಂಥದ್ದು. ನನ್ನ ಮಗ ವಿಕಾಸ್ ಕೂಡ ನಿನ್ನದೇ ಫೀಲ್ಡ್ ನಲ್ಲಿದ್ದಾನೆ.
“ನಿಮ್ಮಿಬ್ಬರ ನಡುವೆ ಫ್ರೆಂಡ್‌ ಶಿಪ್‌ ಮಾಡಿಸಬೇಕೆಂಬುದು ನನ್ನ ಯೋಚನೆ. ನೀವಿಬ್ಬರೂ ಆಫೀಸ್‌ ಗೆ ಹೋಗಿಬಿಡುತ್ತೀರಿ. ಹೀಗಾಗಿ ಇಬ್ಬರೂ ಭೇಟಿ ಆಗಲು ಆಗುವುದಿಲ್ಲ. ಆದರೆ ನೀನು ಹೋಗುವಾಗ ಬರುವಾಗ, ನಿನ್ನನ್ನು ನೋಡಿ ನನ್ನ ಮಗ ನಿನ್ನ ಬಗ್ಗೆ ಬಹಳ ಹೊಗಳುತ್ತಿರುತ್ತಾನೆ. ನನ್ನ ಹೆಂಡತಿ ಕೂಡ ನಿನ್ನ ಬಗ್ಗೆ ಒಳ್ಳೆಯ ಅಭಿಪ್ರಾಯ ಹೊಂದಿದ್ದಾಳೆ. ನಾವು ಕೂಡ ನಿಮ್ಮ ಜಾತಿಗೆ ಸೇರಿದವರು. ಅಷ್ಟೇ ಅಲ್ಲ, ನಿನ್ನದೇ ಜಿಲ್ಲೆಯವರು ಕೂಡ. ನಿನ್ನ ಮನೆಯ ಹಿರಿಯರಿಗೆ ನಮ್ಮ ಕುಟುಂಬದ ಬಗ್ಗೆ ಅವಶ್ಯವಾಗಿ ತಿಳಿದಿರುತ್ತದೆ….”
“ಇರಬಹುದು ಅಂಕಲ್, ನೀವು ನನ್ನನ್ನು ಭೇಟಿಯಾಗಿದ್ದು ನನಗೆ ಬಹಳ ಖುಷಿಯಾಗಿದೆ. ಅವಶ್ಯಕತೆ ಬಿದ್ದಾಗ ನಾನು ವಿಕಾಸ್ ರನ್ನು ಭೇಟಿ ಮಾಡ್ತೀನಿ,” ಎಂದಳು ಶೈಲಾ.
“ಅವಶ್ಯಕತೆ ಇದ್ದಾಗ ಏಕೆ, ಆಗಾಗ ಭೇಟಿ ಮಾಡ್ತಿರಬೇಕು. ನಾವಿರುವುದು ಒಂದೇ ಕಡೆ, ನೀವಿಬ್ಬರೂ ಒಂದೇ ಫೀಲ್ಡ್ ನಲ್ಲಿದ್ದಿರಿ, ಒಂದೇ ಜಾತಿಯವರು ಬೇರೆ. ನೀವು ಆಗಾಗ ಭೇಟಿ ಆಗ್ತಾ ಇರಿ. ಗೊತ್ತಾಯ್ತಲ್ಲ ಶೈಲಾ? ವಿಕಾಸ್ ಗೆ ಮಾತನಾಡಲು ಸಂಕೋಚ. ನೀನೇ ಅವನನ್ನು ಮಾತಾಡಿಸಬೇಕು. ಸ್ವಿಮಿಂಗ್‌ ಪೂಲ್ ನ ಪಕ್ಕದ ಬಿಲ್ಡಿಂಗ್‌ ನ 5ನೇ ಮಹಡಿಯಲ್ಲಿ ನಮ್ಮ ಮನೆ ಇರೋದು. ಇವತ್ತು ರಾತ್ರಿ ನೀನು ಮನೆಗೆ ಊಟಕ್ಕೆ ಬರಬಹುದಲ್ವಾ…..?”
“ಆಯ್ತು ಅಂಕಲ್. ಅದರ ಬಗ್ಗೆ ನಾನು ಗಮನಹರಿಸ್ತೀನಿ. ಆದರೆ ಇಂದು ನಾನು ಊಟಕ್ಕೆ ಬರಲು ಆಗುವುದಿಲ್ಲ. ಏಕೆಂದರೆ ನನಗೆ ಇಂದು ಆಫೀಸ್‌ ನಲ್ಲಿಯೇ ತಡವಾಗುತ್ತದೆ. ಈಗ ನನಗೆ ಆಫೀಸ್‌ ಗೆ ಹೋಗಲು ತಯಾರಾಗಬೇಕು. ನಿಮಗೆ ಕಾಫಿ, ಟೀ ಏನಾದರೂ ಮಾಡಿಕೊಡ್ಲಾ?” ಎಂದು ಶೈಲಾ ಅವರನ್ನು ಸಾಗಹಾಕುವ ಯೋಚನೆಯಿಂದ ಹೇಳಿದಳು.
“ಬೇಡ ಬೇಡ…… ನನ್ನದು ಆಗಲೇ ಆಯ್ತು. ನಾನು ನಿನ್ನನ್ನು ಭೇಟಿ ಆಗಲೆಂದೇ ಬಂದೆ,” ಎಂದರು ನೀಲಕಂಠರಾಯರು.
ಶೈಲಾಳ ಬಿಲ್ಡಿಂಗ್‌ ನಲ್ಲಿಯೇ ಎಲ್ಲಕ್ಕೂ ಮೇಲಿನ ಫ್ಲೋರ್‌ ನಲ್ಲಿದ್ದ ಅನಿಲ್ ಒಂದು ದಿನ ಲಿಫ್ಟ್ ನಲ್ಲಿ ಶೈಲಾಳನ್ನು ಭೇಟಿ ಆಗಿದ್ದರು.
“ಅಂದಹಾಗೆ ಶೈಲಾ, ನೀವು ಹಾಸನ ಕಡೆಯವರು ಅಲ್ವಾ?” ಎಂದು ಮಾತಿಗಿಳಿದರು.
“ಹೌದು,” ಎಂದು ಶೈಲಾ ಚುಟುಕಾಗಿ ಉತ್ತರಿಸಿದಳು.
“ನನ್ನ ಗೆಳೆಯ ಕೂಡ ಅದೇ ಊರಿನವನು. ಜೊತೆಗೆ ನಿಮ್ಮದೇ ಕುಲದವನು. ಅವನ ಫೋಟೋ ನಿಮಗೆ ತೋರಿಸ್ತೀನಿ… ಎಷ್ಟೊಂದು ಸ್ಮಾರ್ಟ್‌ ಆಗಿದ್ದಾನೆ ನೋಡಿ, ನಿಮ್ಮನ್ನು ಬಹಳ ಇಷ್ಟಪಡುತ್ತಾನೆ,” ಅವಕಾಶ ನೋಡಿಕೊಂಡು ಅನಿಲ್ ಗುರಿ ಸಾಧಿಸಲು ನೋಡಿದರು.
“ಇವರು ಚಂದ್ರಕಾಂತ್‌ ಅಲ್ವೇ? ನಾನು ಬ್ಯಾಸ್ಕೆಟ್‌ ಬಾಲ್ ಆಡಲು ಹೋಗುವಾಗ ಇವರು ಒಂದು ಮೂಲೆಯಲ್ಲಿ ನಿಂತು ನನ್ನನ್ನು ನೋಡ್ತಾ ಇರುತ್ತಾರೆ. ಅದೇ ತರಹ ಜಿಮ್ ಗೆ ಹೋಗುವಾಗ ನೋಡ್ತಾ ನಿಂತಿರುತ್ತಾರೆ. ಆಫೀಸಿಗ್‌ ಹೋಗುವಾಗಲೂ ಕೂಡ,” ಶೈಲಾ ಫೋಟೋದಲ್ಲಿದ್ದ ವ್ಯಕ್ತಿಯನ್ನು ಗುರುತಿಸುತ್ತಾ ಹೇಳಿದಳು.
“ನೀವು ಅವನ ಬಗ್ಗೆ ಗಮನಿಸಿದೀರಿ ಅಲ್ವಾ? ವಾಸ್ತವದಲ್ಲಿ ಅವನು ನಿಮ್ಮನ್ನು ಕಣ್ತುಂಬ ನೋಡಲು ಹಿಂಬಾಲಿಸುತ್ತಿರುತ್ತಾನೆ. ಅವನು ಹೃದಯಪೂರ್ವಕವಾಗಿ ತುಂಬಾ ಒಳ್ಳೆಯವನು. ಆದರೆ ಅದನ್ನು ಪ್ರಕಟಪಡಿಸಲು ಆಗುತ್ತಿಲ್ಲ,” ಎಂದರು.
“ಆದರೆ ಅಂಕಲ್, ನಾನು ಆ ವ್ಯಕ್ತಿಯನ್ನು ಸ್ಟಾಕರ್‌ ಎಂದು ಭಾವಿಸಿ, ಪೊಲೀಸ್‌ ವಶಕ್ಕೆ ಒಪ್ಪಿಸಬೇಕು ಅಂತಿದ್ದೆ,” ಎಂದಳು ಶೈಲಾ.
“ಇದೇನು ಶೈಲಾ ಹೀಗೆ ಮಾಡುತ್ತಿರುವಿರಿ? ಅದು ಅವನ ಪ್ರೀತಿಯಷ್ಟೇ,” ಎಂದು ಅನಿಲ್ ತಿಳಿಸಿ ಹೇಳಲು ಪ್ರಯತ್ನಿಸಿದರು.
“ಬಹಳ ವಿಚಿತ್ರ ಪ್ರೀತಿ ಅಂಕಲ್. ಅವನಿಗೆ ಸ್ವಲ್ಪ ಗ್ರೂಮ್ ಮಾಡಿಕೊಳ್ಳಲು ಹೇಳಿ,” ಎಂದು ತನ್ನ ನಗು ತಡೆದುಕೊಳ್ಳುತ್ತಾ ಅಲ್ಲಿಂದ ಹೊರಟುಹೋದಳು.
ಈ ರೀತಿಯಾಗಿ ಶೈಲಾ ಹಾಗೂ ರೋಹಿತ್ ರ ಸ್ನೇಹ ಅಪಾರ್ಟ್‌ ಮೆಂಟ್‌ ನ ಬಹಳಷ್ಟು ಜನರಿಗೆ ಹೊಟ್ಟೆಕಿಚ್ಚನ್ನುಂಟು ಮಾಡಿತ್ತು. ಶೈಲಾ ಹಾಗೂ ರೋಹಿತ್ ಪರಸ್ಪರರ ಮುಂದೆ ಈ ಬಗ್ಗೆ ಹೇಳಿಕೊಂಡು ಸಾಕಷ್ಟು ನಗುತ್ತಿದ್ದರು. ಅವರ ಸ್ನೇಹ ಎಷ್ಟೊಂದು ಜನರಲ್ಲಿ ಅಲ್ಲೋಲ ಕಲ್ಲೋಲ ಉಂಟು ಮಾಡಿತ್ತೆಂದರೆ, ಆ ಬಗ್ಗೆ ಅವರು ಕಲ್ಪನೆ ಕೂಡ ಮಾಡಿಕೊಂಡಿರಲಿಲ್ಲ.
ಈಗ ಅವರು ಅಪಾರ್ಟ್‌ ಮೆಂಟ್‌ ನ ಹೊರಗಡೆ ಕೂಡ ಭೇಟಿಯಾಗುತ್ತಿದ್ದರು. ಅವರ ಸ್ನೇಹ ಈಗ ಪ್ರೀತಿಯಲ್ಲಿ ಪರಿವರ್ತನೆಗೊಂಡಿತ್ತು. ಇಬ್ಬರೂ ಪರಸ್ಪರರನ್ನು ಇಷ್ಟಪಡತೊಡಗಿದ್ದರು. ಅಷ್ಟೇ ಸಮರ್ಥರೂ ಕೂಡ ಆಗಿದ್ದರು. ರೋಹಿತ್ ತಾಯಿಗೂ ಕೂಡ ಇವರಿಬ್ಬರ ಸಂಬಂಧದ ಬಗ್ಗೆ ಯಾವುದೇ ಆಕ್ಷೇಪಗಳಿರಲಿಲ್ಲ.
10 ದಿನಗಳ ಬಳಿಕ ಶೈಲಾಳ ಹುಟ್ಟುಹಬ್ಬವಿತ್ತು. ಈ ಸಲದ ಬರ್ತ್‌ ಡೇಗೆ ತಾನು ಸರ್ಪ್ರೈಸ್‌ ಕೊಡಬೇಕೆಂದು ರೋಹಿತ್ ನಿರ್ಧರಿಸಿದ. ಅದಕ್ಕಾಗಿ ಅವನು ಒಂದು ರೆಸಾರ್ಟ್‌ ಬುಕ್‌ ಮಾಡಿದ್ದ. ಅವಳ ಬರ್ತ್‌ ಡೇಯನ್ನು ಅತ್ಯಂತ ವೈಭವದಿಂದ ಸೆಲೆಬ್ರೇಟ್‌ ಮಾಡಿದ. ರಾತ್ರಿ 12 ಗಂಟೆಗೆ ಸರಿಯಾಗಿ ಕೇಕ್‌ ಕಟ್‌ ಮಾಡಿಸಿದ.
ಆ ರಾತ್ರಿ ರೋಹಿತ್ ಶೈಲಾಳನ್ನು ಪ್ರೀತಿಯಿಂದ ಕೇಳಿದ, “ಇವತ್ತಿನ ದಿನ ನೀನು ಏನನ್ನು ಕೇಳುತ್ತೇವೋ ನಾನು ಅದನ್ನು ಕೊಟ್ಟು ನಿನ್ನ ಆಸೆ ಈಡೇರಿಸಲು ಪ್ರಯತ್ನಿಸ್ತೀನಿ. ನಿನಗೇನು ಬೇಕು ಕೇಳು,” ಎಂದ.
“ನಿಜವಾಗ್ಲೂ…..?”
“ಹೌದು.”
“ಹಾಗಾದರೆ ಸರಿ. ನನಗೆ ಕೆಲವು ಜನರ ಕನಸನ್ನು ಕಿತ್ತುಕೊಂಡು ಅದನ್ನು ನಮ್ಮದಾಗಿಸಿಕೊಳ್ಳಬೇಕು.”
“ಅಂದ್ರೆ…..?”
“ಅಂದ್ರೆ…. ಯಾರ ಕಣ್ಣಲ್ಲಿ ನಿಮ್ಮ ಮತ್ತು ನನ್ನ ಬಗ್ಗೆ ಕನಸು ಕಟ್ಟಿಕೊಂಡಿದ್ದಾರೊ, ಅವರನ್ನು ಆ ಕನಸುಗಳಿಂದ ಎಂದೆಂದಿಗೂ ದೂರ ಮಾಡಬೇಕು. ಆ ಕನಸುಗಳನ್ನು ನನ್ನ ಕಣ್ಣುಗಳಲ್ಲಿ ಕಟ್ಟಿಕೊಂಡಿದ್ದೇನೆ. ಅಂದರೆ ನಿಮ್ಮನ್ನು ನನ್ನವರನ್ನಾಗಿಸಿಕೊಳ್ಳಬೇಕಿದೆ,” ಶೈಲಾ ವಿಶಿಷ್ಟ ರೀತಿಯಲ್ಲಿ ಹೇಳಿ ಮುಗುಳ್ನಕ್ಕಳು.
ರೋಹಿತ್ ಗೆ ಈ ವಿಷಯ ಗೊತ್ತಾಗುತ್ತಿದ್ದಂತೆ ಅವಳನ್ನು ತನ್ನ ಬಾಹುಗಳಲ್ಲಿ ಬಂಧಿಸಿ ಅವಳದೇ ಶೈಲಿಯಲ್ಲಿ, “ಹಾಗಾದರೆ ಸರಿ, ಆ ಕನಸುಗಳಿಗೆ ಹೊಸ ರೂಪ ಕೊಡೋಣ ಮತ್ತು ನಮ್ಮ ಸಂಬಂಧಕ್ಕೆ ಹೊಸದೊಂದು ಹೆಸರು ಕೊಡೋಣ,” ಎಂದು ಹೇಳಿದ.
ಬಳಿಕ ಇಬ್ಬರೂ ತಮ್ಮ ಮುಂಬರುವ ಜೀವನದ ಹೊಸ ಕನಸುಗಳನ್ನು ತಮ್ಮ ಕಣ್ಣುಗಳಲ್ಲಿ ತುಂಬಿಸಿಕೊಂಡು ಪರಸ್ಪರರಲ್ಲಿ ಕಳೆದುಹೋದರು.
1 ತಿಂಗಳಲ್ಲಿಯೇ ಮದುವೆಯಾಗಿ ಶೈಲಾ ರೋಹಿತ್ ನ ಮನೆಯೊಡತಿ ಹಾಗೂ ಮನದೊಡತಿಯಾದಳು. ಈ ರೀತಿಯಾಗಿ ಬಹಳಷ್ಟು ಜನರ ಕನಸುಗಳು ಒಂದೇ ಕ್ಷಣದಲ್ಲಿ ನುಚ್ಚುನೂರಾದವು.
