ದೀಪಾವಳಿಯ ಸಂಭ್ರಮಕ್ಕೆ ಸೊಗಸಾದ ಸಿಹಿ ತಿನಿಸು

ರಸಗುಲ್ಲ

ಸಾಮಗ್ರಿ : ಅರ್ಧ ಲೀ. ಹಾಲು, 2 ದೊಡ್ಡ ಚಮಚ ನಿಂಬೆರಸ, 1 ಕಪ್‌ ನೀರು, 5-6 ಐಸ್‌ ಕ್ಯೂಬ್ಸ್, 3 ಕಪ್‌ ಸಕ್ಕರೆ, 2 ಚಿಟಕಿ ಏಲಕ್ಕಿಪುಡಿ, 3-4 ಪಿಸ್ತಾ ಚೂರು.

ವಿಧಾನ : ಹಾಲು ಕಾಯಿಸಿ. ಮಂದ ಉರಿ ಮಾಡಿ ಇದಕ್ಕೆ ನಿಂಬೆಹಣ್ಣು ಹಿಂಡಬೇಕು. ಹಾಲು ಒಡೆದಾಗ, ಅದನ್ನು ಸೋಸಿಕೊಂಡು, ಗಟ್ಟಿ ಪದಾರ್ಥ ಬೇರೆ ಮಾಡಿ. ಆಮೇಲೆ ಅದಕ್ಕೆ ಐಸ್‌ ಕ್ಯೂಬ್ಸ್ ಹಾಕಿರಿಸಿ, ಚೆನ್ನಾಗಿ ತಣ್ಣಗಾದ ಮೇಲೆ ಮತ್ತೆ ಸೋಸಬೇಕು. ಈ ಗಟ್ಟಿ ಪದಾರ್ಥವನ್ನು ತಣ್ಣೀರಲ್ಲಿ ತೊಳೆದು, ಅರ್ಧ ಗಂಟೆ ಹಾಗೆ ಬಿಡಿ. ಆಮೇಲೆ ಅದನ್ನು ಚೆನ್ನಾಗಿ ಮಸೆದು, ಪೂರಿ ಹಿಟ್ಟಿನ ತರಹ ನಾದಿಕೊಳ್ಳಿ. ಆಮೇಲೆ ಇದನ್ನು ಸಣ್ಣ ಬಾಲ್ಸ್ ಮಾಡಿಕೊಂಡು ಬೇರೆಯಾಗಿಡಿ.

ನಂತರ ಒಂದು ಪಾತ್ರೆಗೆ ನೀರು, ಸಕ್ಕರೆ, ಏಲಕ್ಕಿಪುಡಿ ಸೇರಿಸಿ ಒಲೆಯ ಮೇಲಿರಿಸಿ ಪಾಕ ತಯಾರಿಸಿ. ಈ ಪಾಕಕ್ಕೆ ಎಲ್ಲಾ ಬಾಲ್ಸ್ ತೇಲಿಬಿಟ್ಟು, ಅದನ್ನು ಒಲೆಯ ಮೇಲಿರಿಸಿ, ಮುಚ್ಚಳ ಮುಚ್ಚಿರಿಸಿ ಮಂದ ಉರಿಯಲ್ಲಿ 10-12 ನಿಮಿಷ ಚೆನ್ನಾಗಿ ಬೇಯಲು ಬಿಡಿ. ಇವು ಚೆನ್ನಾಗಿ ಉಬ್ಬಿದೆಯೇ ಎಂದು ಖಾತ್ರಿಪಡಿಸಿಕೊಂಡು ಕೆಳಗಿಳಿಸಿ, ಆರಲು ಬಿಡಿ. 1 ಗಂಟೆ ಕಾಲದ ನಂತರ ಇದರ ಮೇಲೆ ಪಿಸ್ತಾ ಉದುರಿಸಿ, ಸವಿಯಲು ಕೊಡಿ.

ಸೋರೆಯ ಹಲ್ವಾ

ಸಾಮಗ್ರಿ : 1 ದೊಡ್ಡ ಸೋರೆಕಾಯಿ, 250 ಗ್ರಾಂ ಖೋವಾ, ತುಸು ಏಲಕ್ಕಿಪುಡಿ, ಒಂದಿಷ್ಟು ದ್ರಾಕ್ಷಿ, ಗೋಡಂಬಿ, ಬಾದಾಮಿ, ಪಿಸ್ತಾ ಚೂರು, 400-500 ಗ್ರಾಂ ತುಪ್ಪ ಸಕ್ಕರೆ.

ವಿಧಾನ : ಮೊದಲು ಸೋರೆಕಾಯಿಯ ಸಿಪ್ಪೆ ಹೆರೆದು ನೀಟಾಗಿ ತುರಿದಿಡಿ. ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ ಮೊದಲು ದ್ರಾಕ್ಷಿ, ಗೋಡಂಬಿಗಳನ್ನು ಹುರಿದು ತೆಗಿದಿಡಿ. ನಂತರ ಸೋರೆ ತುರಿ, ಏಲಕ್ಕಿ ಹಾಕಿ ಮಂದ ಉರಿಯಲ್ಲಿ ಚೆನ್ನಾಗಿ ಹುರಿಯಬೇಕು. ಆಮೇಲೆ ಸಕ್ಕರೆ ಹಾಕಿ ಕೆದಕಬೇಕು. ಮಧ್ಯೆ ಮಧ್ಯೆ ತುಪ್ಪ ಬೆರೆಸುತ್ತಾ ತಳ ಹಿಡಿಯದಂತೆ ನೋಡಿಕೊಳ್ಳಿ. ಆಮೇಲೆ ಇದಕ್ಕೆ ಮಸೆದ ಖೋವಾ ಬೆರೆಸಿ ಕೈಯಾಡಿಸಿ. ಕೊನೆಯಲ್ಲಿ ದ್ರಾಕ್ಷಿ, ಗೋಡಂಬಿಗಳನ್ನು ಸೇರಿಸಿ, ಎಲ್ಲವೂ ಬೆರೆತುಕೊಳ್ಳುವಂತೆ ಮಾಡಿ ಕೆಳಗಿಳಿಸಿ. ಬಿಸಿ ಇರುವಾಗಲೇ ತುಪ್ಪ ಬೆರೆಸಿ ಸವಿಯಲು ಕೊಡಿ.

ಗೋಡಂಬಿ ಬರ್ಫಿ

ಸಾಮಗ್ರಿ : 500 ಗ್ರಾಂ ಗೋಡಂಬಿ, 2 ಕಪ್‌ ಸಕ್ಕರೆ, ಅಗತ್ಯವಿದ್ದಷ್ಟು ಹಾಲು ನೀರು ತುಪ್ಪ, ತುಸು ಏಲಕ್ಕಿಪುಡಿ ಬೆಳ್ಳಿ ರೇಕು.

ವಿಧಾನ : ಹಿಂದಿನ ರಾತ್ರಿ ಇಡಿಯಾದ ಗೋಡಂಬಿ (ಗೋವಾ ಮೂಲದ್ದಾದರೆ ಉತ್ತಮ)ಗಳನ್ನು ಉಗುರು ಬೆಚ್ಚಗಿನ ಹಾಲಲ್ಲಿ ನೆನೆಹಾಕಿ ಮಾರನೇ ದಿನ ನುಣ್ಣಗೆ ರುಬ್ಬಿಕೊಳ್ಳಿ. ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ ಈ ಪೇಸ್ಟ್ ಹಾಕಿ ನಿಧಾನವಾಗಿ ಕೆದಕಬೇಕು. ಆಮೇಲೆ ಸಕ್ಕರೆ ಬೆರೆಸಿ ಕೈಯಾಡಿಸಿ. ಏಲಕ್ಕಿಪುಡಿ, ತುಪ್ಪ ಬೆರೆಸುತ್ತಾ ಘಂ ಎನ್ನುವಂತೆ ಹದನಾಗಿ ಬಾಡಿಸಿ. 5-6 ನಿಮಿಷಗಳ ನಂತರ, ತುಪ್ಪ ಸವರಿದ ಅಗಲ ತಟ್ಟೆಗೆ ಇದನ್ನು ಹರಡಿ, ಬೆಳ್ಳಿ ರೇಕು ಅಂಟಿಸಿ. ಆಮೇಲೆ ಚೆನ್ನಾಗಿ ಆರಿದ ನಂತರ ಚಿತ್ರದಲ್ಲಿರುವಂತೆ ಕತ್ತರಿಸಿ ಸವಿಯಲು ಕೊಡಿ.

ಮ್ಯಾಂಗೋ ಫಿರನಿ

ಸಾಮಗ್ರಿ : 2 ಕಪ್‌ ಹಾಲು, 1 ಕಪ್‌ ಸಕ್ಕರೆ, 3-4 ಚಮಚ ಅಕ್ಕಿಹಿಟ್ಟು, 4-5 ಕೇಸರಿ ಎಸಳು, 1 ದೊಡ್ಡ ಮಾಗಿದ ಮಾವು, 2 ಚಿಟಕಿ ಏಲಕ್ಕಿಪುಡಿ.

ವಿಧಾನ : ಒಂದು ಪ್ಯಾನ್‌ನಲ್ಲಿ ಮೊದಲು ಮುಕ್ಕಾಲು ಭಾಗದಷ್ಟು ಹಾಲು ಬಿಸಿ ಮಾಡಿ. ಹಾಲು ಕುದಿಯ ತೊಡಗಿದಂತೆ ಅದಕ್ಕೆ ಸಕ್ಕರೆ, ಏಲಕ್ಕಿ ಬೆರೆಸಿ ಮರಳಿಸಿ. ಈಗ ಉಳಿದ ಹಾಲನ್ನು ಬಿಸಿ ಮಾಡಿಕೊಂಡು ಒಂದು ಬಟ್ಟಲಿಗೆ ಹಾಕಿ, ಇದಕ್ಕೆ ಅಕ್ಕಿಹಿಟ್ಟು ಬೆರೆಸಿ ಕದಡಿಕೊಳ್ಳಿ. ಇದನ್ನು ಒಲೆಯ ಮೇಲಿನ ಕುದಿ ಹಾಲಿಗೆ ಬೆರೆಸಿ ಮತ್ತಷ್ಟು ಕುದಿಸಿರಿ. ಆಮೇಲೆ ಹಾಲಲ್ಲಿ ನೆನೆಸಿದ ಕೇಸರಿ ಬೆರೆಸಿ ಗೊಟಾಯಿಸಿ. ನಂತರ ಸಿಪ್ಪೆ ಹೆರೆದು ಹೋಳಾಗಿಸಿ, ಮಿಕ್ಸಿಯಲ್ಲಿ ಪೇಸ್ಟ್ ಮಾಡಿದ ಮಾವು ಬೆರೆಸಬೇಕು. ಇದು ಕುದ್ದು ಸಾಕಷ್ಟು ಗಟ್ಟಿಯಾದಾಗ, ಒಲೆಯಿಂದ ಇಳಿಸಿಬಿಡಿ, 40 ನಿಮಿಷ ಚೆನ್ನಾಗಿ ಆರಲು ಬಿಡಿ. ಇದಕ್ಕೆ ಬಾದಾಮಿ, ಪಿಸ್ತಾ ಚೂರು ಹಾಕಿ ಮಿಕ್ಸ್ ಮಾಡಿ, ಫ್ರಿಜ್‌ನಲ್ಲಿ 1-2 ತಾಸು ಇರಿಸಿ, ಫ್ರೂಟ್‌ ಜ್ಯಾಂ ಹಾಕಿ ತೇಲಿಸಿ ಸವಿಯಲು ಕೊಡಿ.

ಮಾಲ್ ಪುವಾ

ಸಾಮಗ್ರಿ : 1 ಕಪ್‌ ಮೈದಾ, ಅರ್ಧ ಕಪ್‌ ಸಕ್ಕರೆ, 1 ಚಮಚ ಸೋಂಪು, ಪುಡಿ ಮಾಡಿದ 10 ಕಾಳುಮೆಣಸು, ಅರ್ಧ ಕಪ್‌ ಮೊಸರು, 1-1 ಚಮಚ ಪಿಸ್ತಾ ಬಾದಾಮಿ ಚೂರು, ಕರಿಯಲು ರೀಫೈಂಡ್‌ ಎಣ್ಣೆ, 2 ಚಿಟಕಿ ಉಪ್ಪು.

ವಿಧಾನ : ಒಂದು ಬಟ್ಟಲಿಗೆ ಮೇಲಿನ ಎಲ್ಲಾ ಸಾಮಗ್ರಿ ಜೊತೆ 1 ಕಪ್‌ ಬಿಸಿ ನೀರು ಬೆರೆಸಿಕೊಂಡು, ಇಡ್ಲಿಹಿಟ್ಟಿನ ಹದಕ್ಕೆ ಕಲಸಿಡಿ. ಇದನ್ನು 1 ತಾಸು ಹಾಗೆ ನೆನೆಯಲು ಬಿಡಿ. ನಂತರ ಎಣ್ಣೆ ಬಿಸಿ ಮಾಡಿಕೊಂಡು ಅರ್ಧದಷ್ಟು ಚಿಕ್ಕ ಸೌಟಿನ ಮಿಶ್ರಣವನ್ನು ನೇರವಾಗಿ ಎಣ್ಣೆ. ಬಿಡಬೇಕು. ಈ ರೀತಿ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು ಬಟರ್‌ ಪೇಪರ್‌ ಮೇಲೆ ಹೆಚ್ಚುವರಿ ಎಣ್ಣೆ ಹೋಗಲಾಡಿಸಲು ಇವನ್ನು ಹರಡಿಕೊಳ್ಳಿ. ಕೊನೆಯಲ್ಲಿ ಚಿತ್ರದಲ್ಲಿ ತೋರಿಸಿದಂತೆ, ಇವನ್ನು ಗುಂಡಗೆ ಕತ್ತರಿಸಿ ಕೊಬ್ಬರಿ ತುರಿ, ಪಿಸ್ತಾ ಬಾದಾಮಿ ಚೂರುಗಳಿಂದ ಅಲಂಕರಿಸಿ ಸವಿಯಲು ಕೊಡಿ.

ಬಾದಾಮಿ ಪಾಕೀಜಾ

ಸಾಮಗ್ರಿ : ಹಿಂದಿನ ರಾತ್ರಿ ಹಾಲಲ್ಲಿ ನೆನೆಸಿ ಬೆಳಗ್ಗೆ ರುಬ್ಬಿದ 1 ಕಪ್‌ ಬಾದಾಮಿ ಪೇಸ್ಟ್, 2 ಕಪ್‌ ಸಕ್ಕರೆ, 3 ಕಪ್‌ ತುಪ್ಪ, 1 ಕಪ್‌ ನೀರು. ಅಲಂಕರಿಸಲು ಬೆಳ್ಳಿ ರೇಕು, ಇಡಿಯಾದ ಬಾದಾಮಿ, ದ್ರಾಕ್ಷಿ, ಪಿಸ್ತಾ ಚೂರು.

ವಿಧಾನ : ಸಕ್ಕರೆಗೆ ನೀರು ಬೆರೆಸಿ ಗಟ್ಟಿ ಪಾಕ ತಯಾರಿಸಿ. ಇದು ಚೆನ್ನಾಗಿ ಕುದ್ದು ಮುಕ್ಕಾಲು ಪಾಲು ಹಿಂಗಬೇಕು. ಆರಿದ ನಂತರ ಅದನ್ನು 1 ತಾಸು ಫ್ರಿಜ್‌ನಲ್ಲಿರಿಸಿ. ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ, ಅದಕ್ಕೆ ಬಾದಾಮಿ ಪೇಸ್ಟ್ ಬೆರೆಸಿ ಕೆದಕಬೇಕು. ಆಮೇಲೆ ತುಸು ಏಲಕ್ಕಿಪುಡಿ, ಸಕ್ಕರೆ ಪಾಕ ಬೆರೆಸಿ ಸತತ ಕೈಯಾಡಿಸಬೇಕು. ನಡುನಡುವೆ ತುಪ್ಪ ಬೆರೆಸುತ್ತಾ ಕೆದಕಿರಿ. ಈ ಮಿಶ್ರಣ ತುಸು ಗುಲಾಬಿ ಬಣ್ಣಕ್ಕೆ ತಿರುಗಿದಾಗ, ತುಪ್ಪ ಸವರಿದ ಅಗಲ ತಟ್ಟೆಗೆ ಇದನ್ನು ಹರಡಬೇಕು. ನಂತರ  ಬೆಳ್ಳಿ ರೇಕು, ದ್ರಾಕ್ಷಿ ಪಿಸ್ತಾ ಚೂರುಗಳಿಂದ, ಅಲಂಕರಿಸಿ ಪೇಡ ಆಕಾರದಲ್ಲಿ ಕತ್ತರಿಸಬೇಕು. ಇದರ ಮೇಲೆ ಒಂದೊಂದು ಬಾದಾಮಿ ಇರಿಸಿ, ತುಸು ಹೊತ್ತು ಫ್ರಿಜ್‌ನಲ್ಲಿರಿಸಿ ನಂತರ ಸವಿಯಲು ಕೊಡಿ.

ರಾಜ್‌ ಭೋಗ್‌

ಸಾಮಗ್ರಿ : ಹಾಲು ಒಡೆದು ಬೇರ್ಪಡಿಸಿದ 100 ಗ್ರಾಂ ಪನೀರ್‌, ಕೆಲವು ಹನಿ ಕೇಸರಿ ಬಣ್ಣ, 1 ಸಣ್ಣ ಚಮಚ ಮೈದಾ, 2-2 ಚಮಚ ಪಿಸ್ತಾ, ಬಾದಾಮಿ ಚೂರು, 2 ಚಮಚ ಪುಡಿಸಕ್ಕರೆ, ಅರ್ಧ ಸಣ್ಣ ಚಮಚ ಏಲಕ್ಕಿಪುಡಿ, 5 ಕಪ್‌ ಸಕ್ಕರೆ.

ವಿಧಾನ : ಮಸೆದ ಪನೀರ್‌ಗೆ ಕೇಸರಿ ಬಣ್ಣ, ಏಲಕ್ಕಿಪುಡಿ ಬೆರೆಸಿ ಮಿಶ್ರಣ ತಯಾರಿಸಿ. ಇದನ್ನು ಬೇರೆಯಾಗಿರಿಸಿ. ಇದರಿಂದ 1-2 ಚಮಚದಷ್ಟು ಮಿಶ್ರಣ ತೆಗೆದುಕೊಂಡು, ಅದಕ್ಕೆ ಪಿಸ್ತಾ, ಬಾದಾಮಿ ಚೂರು ಬೆರೆಸಿ, ಸಣ್ಣ ಗಾತ್ರದ ಉಂಡೆ ಮಾಡಿಡಿ. ಒಂದು ಬಟ್ಟಲಿಗೆ ಮೈದಾ ಹಾಕಿಕೊಂಡು, ಅದಕ್ಕೆ ತುಸು ನೀರು ಬೆರೆಸಿ ದೋಸೆ ಹಿಟ್ಟಿನಂತೆ ಮಾಡಿ. ಇದರಲ್ಲಿ ಪನೀರ್‌ ಉಂಡೆಗಳನ್ನು ತೇಲಿಬಿಡಿ. ಒಂದು ಪಾತ್ರೆಯಲ್ಲಿ ಸಕ್ಕರೆಗೆ ನೀರು ಬೆರೆಸಿ ಗಟ್ಟಿ ಪಾಕ ತಯಾರಿಸಿ. ಇದಕ್ಕೆ ಅರ್ಧ ಭಾಗದಷ್ಟು ಮೈದಾ ಮಿಶ್ರಣ ಬೆರೆಸಿ. ಆಮೇಲೆ ಉಂಡೆಗಳನ್ನು ಪಾಕಕ್ಕೆ ಹಾಕಿ. ಅದು ಕುದಿಯುತ್ತಿದ್ದಂತೆ ಉಳಿದ ಮೈದಾ ಮಿಶ್ರಣ ಸಹ ಬೆರೆಸಬೇಕು. ಮಂದ ಉರಿಯಲ್ಲಿ ಇದನ್ನು 20 ನಿಮಿಷ ಕುದಿಸಬೇಕು. ಆಗಾಗ ಈ ಉಂಡೆಗಳ ಮೇಲೆ ಹನಿ ಹನಿಯಾಗಿ ನೀರು ಚಿಮುಕಿಸಬೇಕು. ಕೆಳಗಿಳಿಸಿ ಚೆನ್ನಾಗಿ ಆರಿದ ಮೇಲೆ, 3-4 ತಾಸು ಫ್ರಿಜ್‌ನಲ್ಲಿರಿಸಿ ನಂತರ ಸವಿಯಲು ಕೊಡಿ.

ಪಿಸ್ತಾ ಬರ್ಫಿ

ಸಾಮಗ್ರಿ : 400 ಗ್ರಾಂ ಪಿಸ್ತಾ, 250 ಗ್ರಾಂ ಸಕ್ಕರೆ, 7-8 ಬೆಳ್ಳಿ ರೇಕು, ಅಗತ್ಯವಿದ್ದಷ್ಟು ತಣ್ಣೀರು.

ವಿಧಾನ : ಎಲ್ಲಕ್ಕೂ ಮೊದಲು ಬಿಸಿ ನೀರಿಗೆ ತಾಜಾ ಪಿಸ್ತಾ ಹಾಕಿ ಚೆನ್ನಾಗಿ ನೆನೆಯಲು ಬಿಡಿ. ಇದರ ಸಿಪ್ಪೆ ಸುಲಿದ ನಂತರ, ತುಸು ಹಾಲು ಬೆರೆಸಿ ನುಣ್ಣಗೆ ಪೇಸ್ಟ್ ಮಾಡಿಡಿ. ದಪ್ಪ ತಳದ ಬಾಣಲೆಯಲ್ಲಿ 2 ಕಪ್‌ ನೀರಿಗೆ ಸಕ್ಕರೆ ಬೆರೆಸಿ ಪಾಕ ತಯಾರಿಸಿ. ಈ ಪಾಕ ಗಟ್ಟಿಯಾದಾಗ ಇದಕ್ಕೆ ಪಿಸ್ತಾ ಪೇಸ್ಟ್ ಬೆರೆಸಿ ಚೆನ್ನಾಗಿ ಕೆದಕಬೇಕು. ಮಂದ ಉರಿ ಇರಲಿ, ನಡುನಡುವೆ ತುಪ್ಪ ಬೆರೆಸುತ್ತ ಹದ ನೋಡಿಕೊಳ್ಳಿ. ಹೀಗೆ 5-6 ನಿಮಿಷ ಚೆನ್ನಾಗಿ ಕೆದಕಿ ಕೆಳಗಿಳಿಸಿ. ತುಪ್ಪ ಸವರಿದ ಅಗಲ ತಟ್ಟೆಯ ಮೇಲೆ ಇದನ್ನು ಸಮನವಾಗಿ ಹರಡಿ, ಮೇಲೆ ಬೆಳ್ಳಿ ರೇಕು ಅಂಟಿಸಿಬಿಡಿ. ಚಿತ್ರದಲ್ಲಿರುವಂತೆ ಬರ್ಫಿ ಆಕಾರದಲ್ಲಿ ಕತ್ತರಿಸಿ, ಚೆರ್ರಿಯಿಂದ ಅಲಂಕರಿಸಿ ಸವಿಯಲು ಕೊಡಿ.

ಮಲಾಯಿ ಚಾಪ್‌

ಸಾಮಗ್ರಿ : 3 ಕಪ್‌ ಗಟ್ಟಿ ಹಾಲು, 1 ಸಣ್ಣ ಚಮಚ ವಿನಿಗರ್‌, 1 ಕಪ್‌ ಸಕ್ಕರೆ, 3 ಕಪ್‌ ನೀರು, 100 ಗ್ರಾಂ ಖೋವಾ, 4-5 ದೊಡ್ಡ ಚಮಚ ಕ್ರೀಂ, 2 ಸಣ್ಣ ಚಮಚ ಪುಡಿಸಕ್ಕರೆ, ಒಂದಿಷ್ಟು ದ್ರಾಕ್ಷಿ, ಗೋಡಂಬಿ, ಪಿಸ್ತಾ, ಬಾದಾಮಿ ಚೂರು, 2-3 ಎಸಳು ಕೇಸರಿ, ಕೆಲವು ಹನಿ ಸವಿಯುವ ಬಣ್ಣ.

ವಿಧಾನ : ಮೊದಲು ಹಾಲು ಕಾಯಿಸಿ. ಒಂದು ಬಟ್ಟಲು ಬೆಚ್ಚಗಿನ ನೀರಿಗೆ ವಿನಿಗರ್‌ ಬೆರೆಸಿ ಇದನ್ನು ಕುದಿಯುವ ಹಾಲಿಗೆ ಬೆರೆಸಿ. ಹಾಲು ಒಡೆದು, ನೀರುಗಟ್ಟಿ ಅಂಶ ಬೇರಾಗುತ್ತದೆ. ಕೆಳಗಿಳಿಸಿ ಆರಿದ ಮೇಲೆ ಸೋಸಿಕೊಂಡು ಗಟ್ಟಿ ಅಂಶ ಬೇರ್ಪಡಿಸಿ. ಇದುವೇ ಪನೀರ್‌, ಇದರಿಂದ ಸಣ್ಣ ಸಣ್ಣ ಉಂಡೆ ತಯಾರಿಸಿಕೊಳ್ಳಿ.

ಒಂದು ಬಾಣಲೆಯಲ್ಲಿ ಸಕ್ಕರೆಗೆ ನೀರು ಬೆರೆಸಿ ಕುದಿಯಲು ಇಡಿ. ಚೆನ್ನಾಗಿ ಕುದಿ ಬಂದಾಗ, 20-25 ನಿಮಿಷ ಮಂದ ಉರಿಯಲ್ಲಿ ಮರಳಿಸಿ. ಇದಕ್ಕೆ ಪನೀರ್‌ ಉಂಡೆ ಹಾಕಿ ಕೆಳಗಿಳಿಸಿ. 3-4 ಗಂಟೆಗಳ ಕಾಲ ಹಾಗೇ ಬಿಡಿ. ಒಂದು ಚಿಕ್ಕ ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿ, ಅದಕ್ಕೆ ಖೋವಾ ಸೇರಿಸಿ ಕೆದಕಬೇಕು. ಇದನ್ನು ಕೆಳಗಿಳಿಸಿ ಚೆನ್ನಾಗಿ ಆರಲು ಬಿಡಿ. ಆಮೇಲೆ ಇದಕ್ಕೆ ಕ್ರೀಂ, ಪುಡಿಸಕ್ಕರೆ ಸೇರಿಸಿ ಚೆನ್ನಾಗಿ ಮಿಶ್ರ ಮಾಡಿಕೊಳ್ಳಿ. ಆಮೇಲೆ ಇದಕ್ಕೆ ಸವಿಯುವ ಬಣ್ಣ ಹಾಕಿ ಮತ್ತೆ ಚೆನ್ನಾಗಿ ಮಿಕ್ಸ್ ಮಾಡಬೇಕು. ಇದನ್ನು ಚೆನ್ನಾಗಿ ನೆನೆಯಲು ಬಿಡಿ. ಪಾಕದಿಂದ ಹೊರತೆಗೆದ ಪನೀರ್‌ ಉಂಡೆಗಳನ್ನು 2 ಭಾಗವಾಗಿ ದುಂಡಗೆ ಕತ್ತರಿಸಿ. ಒಂದರ ಮೇಲೆ ಖೋವಾ ಮಿಶ್ರಣ ಇರಿಸಿ, ಇನ್ನೊಂದರಿಂದ ಅದನ್ನು ಕವರ್‌ ಮಾಡಿ. ಇದನ್ನು ಮೃದುವಾಗಿ ಒತ್ತಬೇಕು. ಇದರ ಮೇಲೆ ದ್ರಾಕ್ಷಿ, ಪಿಸ್ತಾ ಚೂರು ಉದುರಿಸಿ, ಚಿತ್ರದಲ್ಲಿರುವಂತೆ ಬೆಳ್ಳಿ ರೇಕು, ಬಾದಾಮಿ ತುಂಡುಗಳಿಂದ ಅಲಂಕರಿಸಿ, 1-2 ತಾಸು ಫ್ರಿಜ್‌ನಲ್ಲಿರಿಸಿ ನಂತರ ಸವಿಯಲು ಕೊಡಿ.

ಪನೀರ್‌ ಗುಲಾಬ್‌ ಜಾಮೂನು

ಸಾಮಗ್ರಿ : 250 ಗ್ರಾಂ ಖೋವಾ, 100 ಗ್ರಾಂ ಪನೀರ್‌, 2 ಚಮಚ ಮೈದಾ, ಗೋಡಂಬಿ ಚೂರು ದ್ರಾಕ್ಷಿ (1-1 ದೊಡ್ಡ ಚಮಚ), 300 ಗ್ರಾಂ ಸಕ್ಕರೆ, ಅಗತ್ಯವಿದ್ದಷ್ಟು ರೀಫೈಂಡ್‌ ಎಣ್ಣೆ ತುಪ್ಪ.

ವಿಧಾನ : ಚೆನ್ನಾಗಿ ಮಸೆದ ಖೋವಾ, ಪನೀರ್‌ ಜೊತೆಗೆ ಮೈದಾ ಬೆರೆಸಿಕೊಂಡು ತುಸು ನೀರು ಚಿಮುಕಿಸಿ ಮೃದು ಮಿಶ್ರಣ ಆಗುವಂತೆ ಕಲಸಬೇಕು. ಇದಕ್ಕೆ ತುಸು ತುಪ್ಪ ಬೆರೆಸಿ ಚೆನ್ನಾಗಿ ನಾದಿಕೊಳ್ಳಿ. ಆಮೇಲೆ ಇದರಿಂದ ಸಣ್ಣ ನಿಂಬೆ ಗಾತ್ರದ ಉಂಡೆಗಳನ್ನು ಮಾಡಿಕೊಂಡು, ಪ್ರತಿಯೊಂದರಲ್ಲೂ 2-2 ಗೋಡಂಬಿ, 1-2 ದ್ರಾಕ್ಷಿ ಸಿಗಿಸಿಡಿ. ಇನ್ನು ಒಂದು ತಟ್ಟೆಯಲ್ಲಿ ಜೋಡಿಸಿಡಿ. ಬಾಣಲೆಯಲ್ಲಿ ಎಣ್ಣೆ ತುಪ್ಪ (ಸಮಪ್ರಮಾಣವಿರಲಿ) ಬೆರೆಸಿ ಬಿಸಿ ಮಾಡಿ. ಅದು ಚೆನ್ನಾಗಿ ಕಾದಾಗ ಈ ಉಂಡೆಗಳನ್ನು ಹೊಂಬಣ್ಣ ಬರುವಂತೆ (ಮಂದ ಉರಿ ಇರಲಿ) ಕರಿಯಿರಿ. ಇವನ್ನು ಹೊರತೆಗೆಯುವಾಗ ಪರಸ್ಪರ ತಗುಲಿ ಒಡೆಯದಂತೆ ಎಚ್ಚರವಹಿಸಿ. ಹೀಗೆ ಇದು ತಯಾರಾಗುತ್ತಿರುವಾಗಲೇ, ಪಕ್ಕದ ಒಲೆಯಲ್ಲಿ ಸ್ಟೀಲ್ ‌ಪಾತ್ರೆಯಲ್ಲಿ ನೀರಿಟ್ಟು ಕುದಿಯುತ್ತಿದ್ದಂತೆ ಸಕ್ಕರೆ, ಏಲಕ್ಕಿಪುಡಿ ಬೆರೆಸಿ ಒಂದೆಳೆಯ ಪಾಕ ತಯಾರಿಸಿ. ಗಾಢ ಪಾಕದಲ್ಲಿ ಜಾಮೂನುಗಳನ್ನು ಮುಳುಗಲು ಬಿಟ್ಟು, ಮರುದಿನ ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.

ಸ್ವಾದಿಷ್ಟ ಚಂಚಂ

ಸಾಮಗ್ರಿ : 1 ಲೀ. ಗಟ್ಟಿ ಹಾಲು, 2-3 ಚಮಚ ನಿಂಬೆರಸ, 2 ಕಪ್‌ ಸಕ್ಕರೆ, 2 ಚಮಚ ಆರಾರೂಟ್‌ ಪೌಡರ್‌, 60 ಗ್ರಾಂ ಖೋವಾ, ಅರ್ಧ ಕಪ್‌ ಪುಡಿಸಕ್ಕರೆ, ಅರ್ಧ ಚಮಚ ಏಲಕ್ಕಿಪುಡಿ, 8-10 ಪಿಸ್ತಾ ಚೂರು, 2-3 ಹನಿ ಕೇದಗೆ ಎಸೆನ್ಸ್.

ವಿಧಾನ : ರಸಗುಲ್ಲ ತಯಾರಿಸಲು ಹಾಲು ಒಡೆದು ಗಟ್ಟಿ ಪದಾರ್ಥ ಬೇರೆ ಮಾಡಿದಂತೆ ಇಲ್ಲೂ ಮಾಡಿ. ಇದನ್ನು ಚೆನ್ನಾಗಿ ಮಸೆದು, ಅದರ ಮೇಲೆ ಆರಾರೂಟ್‌ ಪುಡಿ ಉದುರಿಸಿ, ಚೆನ್ನಾಗಿ ಬೆರೆತುಕೊಳ್ಳುವಂತೆ ಮಾಡಿ. ಒಂದು ಕುಕ್ಕರ್‌ನಲ್ಲಿ ಬಿಸಿ ನೀರಿಟ್ಟು, ಸಕ್ಕರೆ ಹಾಕಿ ಕದಡಿಕೊಳ್ಳಿ. ಹಾಲಿನ ಗಟ್ಟಿ ಪದಾರ್ಥವನ್ನು ಸಣ್ಣ ಉಂಡೆ ಮಾಡಿ, ಓವಲ್ ಶೇಪ್‌ ನೀಡಿ ಇದಕ್ಕೆ ಹಾಕಿ ಲಘುವಾಗಿ ಬೇಯಿಸಿ. ಒಂದು ಸೀಟಿ ಬಂದ ತಕ್ಷಣ ಕೆಳಗಿಳಿಸಿ ಆರಲು ಬಿಡಿ. ನಂತರ ಪಾಕದ ಸಮೇತ ಬೇರೊಂದು ಬಟ್ಟಲಿಗೆ ರವಾನಿಸಿ.

ಚೆನ್ನಾಗಿ ಮಸೆದ ಖೋವಾಗೆ ಸಕ್ಕರೆ, ಏಲಕ್ಕಿಪುಡಿ ಸೇರಿಸಿ ಮ್ಯಾಶ್‌ ಮಾಡಿ. ಆಮೇಲೆ ಪಾಕದಿಂದ ಚಂಚಂ ಹೊರತೆಗೆದು, ಅದನ್ನು ಕಟ್‌ ಮಾಡಿ, ಈ ಸ್ಟಫಿಂಗ್‌ ತುಂಬಿಸಿ. ಚೆನ್ನಾಗಿ ತಣ್ಣಗಾದ ಮೇಲೆ, ಬೆಳ್ಳಿ ರೇಕಿನಿಂದ ಅಲಂಕರಿಸಿ ಸವಿಯಲು ಕೊಡಿ.

ಚಾಕಲೇಟ್‌ ಬರ್ಫಿ

ಸಾಮಗ್ರಿ : 300 ಗ್ರಾಂ ಕುಕಿಂಗ್‌ ಚಾಕಲೇಟ್‌, 4 ಕಪ್‌ ಮಿಲ್ಕ್ ಪೌಡರ್‌, 1 ಕಪ್‌ ಸಕ್ಕರೆ, ಅರ್ಧ ಚಮಚ ಏಲಕ್ಕಿಪುಡಿ, 2-3 ಎಸಳು ಹಾಲಲ್ಲಿ ನೆನೆದ ಕೇಸರಿ, 4 ಚಮಚ ತುಪ್ಪ, ಅರ್ಧ ಕಪ್‌ ಹಾಲು, ಅಲಂಕರಿಸಲು ಬೆಳ್ಳಿ ರೇಕು.

ವಿಧಾನ : ಒಂದು ಪ್ಯಾನಿನಲ್ಲಿ 3 ಕಪ್‌ ನೀರು ಹಾಗೂ ಸಕ್ಕರೆ ಬೆರೆಸಿ ಚೆನ್ನಾಗಿ ಕುದಿಸಿರಿ. ಇದು ಒಂದೆಳೆಯ ಪಾಕದಷ್ಟು ಗಟ್ಟಿಯಾದಾಗ, ಇದಕ್ಕೆ ಮಿಲ್ಕ್ ಪೌಡರ್‌ ಸೇರಿಸಿ ಕೆದಕಬೇಕು. ಆಮೇಲೆ ಇದಕ್ಕೆ ಹಾಲು, ತುಪ್ಪ ಬೆರೆಸಿ ಮಂದ ಉರಿಯಲ್ಲಿ ಕೈಯಾಡಿಸುತ್ತಿರಿ. ಆಮೇಲೆ ಕೇಸರಿ, ಏಲಕ್ಕಿ ಬೆರೆಸಿಕೊಳ್ಳಿ. ಸಾಕಷ್ಟು ಗಟ್ಟಿಯಾಗಿದೆ ಎನಿಸಿದಾಗ ಒಲೆಯಿಂದ ಕೆಳಗಿಳಿಸಿ. ಒಂದು ಅಗಲ ತಟ್ಟೆಗೆ ಜಿಡ್ಡು ಸವರಿ ಈ ಮಿಶ್ರಣವನ್ನು ಅದರ ಮೇಲೆ ಹರಡಿರಿ. ಅದು ನಿಧಾನವಾಗಿ ಆರುತ್ತಿರುವಾಗ, ಒಂದು ಪ್ಯಾನಿನಲ್ಲಿ ನೀರು ಬಿಸಿ ಮಾಡಿ. ಅದರಲ್ಲಿ ತುಂಡರಿಸಿದ ಚಾಕಲೇಟ್‌ ಹಾಕಿದ ಇನ್ನೊಂದು ಬಟ್ಟಲಿರಿಸಿ, ನೀರನ್ನು ಚೆನ್ನಾಗಿ ಮರಳಿಸಿ. ಈ ಡಬ್ಬಲ್ ಬಾಯ್ಲರ್‌ ವಿಧಾನದಲ್ಲಿ ಕರಗಿದ ಚಾಕಲೇಟ್‌ನ್ನು ತಟ್ಟೆಯಲ್ಲಿರುವ ಮಿಶ್ರಣದ ಮೇಲೆ ಹರಡಬೇಕು. ಇದನ್ನು 6-7 ತಾಸು, ಅಲುಗಾಡಿಸದೆ ಆರಲು ಬಿಡಿ. ನಂತರ ಅದರ ಮೇಲೆ ಬೆಳ್ಳಿ ರೇಕು ಅಂಟಿಸಿ, ಬರ್ಫಿ ಆಕಾರದಲ್ಲಿ ಕತ್ತರಿಸಿ, 1 ತಾಸು ಫ್ರಿಜ್‌ನಲ್ಲಿರಿಸಿ ಮತ್ತೆ ಗಟ್ಟಿ ಆಗಲು ಬಿಡಿ. ಆಮೇಲೆ ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.

ಚಾಕಲೇಟ್‌ ಗುಲಾಬ್‌ ಜಾಮೂನು

ಸಾಮಗ್ರಿ : 1 ಕಪ್‌ ಹಾಲಿನಪುಡಿ, ಅರ್ಧ ಕಪ್‌ ಮೈದಾ, ಅರ್ಧ ಸಣ್ಣ ಚಮಚ ಬೇಕಿಂಗ್‌ ಸೋಡ, 1-2 ಚಮಚ ಚಾಕಲೇಟ್‌ ಪೌಡರ್‌, 4 ಚಮಚ ಕರಗಿದ ಬೆಣ್ಣೆ, ತುಸು ಹಾಲು ತುಪ್ಪ, ಪಾಕಕ್ಕಾಗಿ 2 ಕಪ್‌ ಸಕ್ಕರೆ, 1 ಕಪ್‌ ನೀರು, 4-5 ಏಲಕ್ಕಿ (ಪುಡಿ ಮಾಡಿಡಿ), 2 ಚಿಟಕಿ ಪಚ್ಚ ಕರ್ಪೂರ, 8-10 ಎಸಳು ಹಾಲಲ್ಲಿ ನೆನೆದ ಕೇಸರಿ, ಚಾಕಲೇಟ್‌ ಸಾಸ್‌ಗಾಗಿ 5-6 ಔನ್ಸ್ ವೈಟ್‌ ಚಾಕಲೇಟ್‌, 3 ಕಪ್ ಕ್ರೀಂ, ಗಾರ್ನಿಶ್‌ಗೊಳಿಸಲು ತುಸು ಮಸೆದ ಕ್ರೀಂ, ಚಾಕಲೇಟ್‌ ಸಿರಪ್‌, ಕರಿಯಲು ರೀಫೈಂಡ್‌ ಎಣ್ಣೆ.

ವಿಧಾನ : ಮೊದಲು ಹಾಲಿನಪುಡಿ, ಹಾಲು, ಕರಗಿದ ಬೆಣ್ಣೆ ಬೆರೆಸಿಕೊಂಡು ಪೂರಿ ಹಿಟ್ಟಿನಂತೆ ಮೃದುವಾಗಿ ಕಲಸಿಡಿ. ಇದರಿಂದ ಸಣ್ಣ ಸಣ್ಣ ಬಾಲ್ಸ್ ತಯಾರಿಸಿ. ಇದನ್ನು ತಟ್ಟೆಯಲ್ಲಿ ಜೋಡಿಸಿಕೊಂಡು, ಮೇಲೊಂದು ಬಟ್ಟೆ ಮುಚ್ಚಿಡಿ. ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿಕೊಂಡು, ಈ ಬಾಲ್ಸ್ ನ್ನು ಹೊಂಬಣ್ಣ ಬರುವಂತೆ ಕರಿಯಿರಿ. ಇವನ್ನು ಬದಿಗಿರಿಸಿ ಏಲಕ್ಕಿಪುಡಿ ಬೆರೆಸಿ, ಒಂದೆಳೆಯ ಪಾಕ ತಯಾರಿಸಿ. ನಂತರ ಈ ಗಟ್ಟಿ ಪಾಕವನ್ನು ಒಂದು ಸ್ಟೀಲ್ ಪಾತ್ರೆಗೆ ಹಾಕಿಡಿ. ಅದಕ್ಕೆ ತುಸು ಗುಲಾಬಿ ಜಲ ಬೆರೆಸಿ ಎಲ್ಲಾ ಕರಿದ ಜಾಮೂನುಗಳನ್ನು ಪಾಕದಲ್ಲಿ ಹಾಕಿಡಿ. 2-3 ತಾಸಿನ ನಂತರ ಡಬ್ಬಲ್ ಬಾಯ್ಲರ್‌ ವಿಧಾನದಲ್ಲಿ ವೈಟ್‌ ಚಾಕಲೇಟ್‌ ಕರಗಿಸಿಕೊಂಡು ಅದಕ್ಕೆ ಕ್ರೀಂ ಬೆರೆಸಿಕೊಳ್ಳಿ. ಆಮೇಲೆ ಜಾಮೂನುಗಳನ್ನು ತೆಗೆದು ಈ ಸಾಸ್‌ಗೆ ಹಾಕಿಡಿ. ಆಮೇಲೆ ಒಂದೊಂದಾಗಿ ಪ್ಲೇಟ್‌ನಲ್ಲಿ ಜೋಡಿಸಿಕೊಂಡು, ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.